কোভিডৰ দক্ষিণ আফ্ৰিকাৰ প্ৰজাতি অমিক্ৰনৰ সংহাৰ এতিয়া দেশত আৰম্ভ হৈ গৈছে।
দুদিন আগলৈকে দেশত অমিক্ৰনত আক্ৰান্ত লোকৰ সংখ্যা হৈছেগৈ ১৪৩ গৰাকী। মহাৰাষ্ট্ৰত ৩২ গৰাকী, দিল্লীত ২২ গৰাকী,ৰাজস্থানত ১৭ গৰাকী,কৰ্ণাটক আৰু তেলেংগানাত ৮ গৰাকীকৈ,গুজৰাট আৰু কেৰালাত ৫ গৰাকীকৈ লোক অমিক্ৰনত আক্ৰান্ত হৈছিল।এতিয়া প্ৰতিখন ৰাজ্যতে আক্ৰান্তৰ সংখ্যা বাঢ়িছে।
একেদৰে অন্ধ্ৰ প্ৰদেশ, চণ্ডীগড়,তামিলনাডু তথা পশ্চিমবংগত একাধিক লোক অমিক্ৰনত আক্ৰান্ত হোৱাৰ খবৰ আহিছে।
ইপিনে দেশত অমিক্ৰনৰ দ্ৰুত সংক্ৰমণৰ পৰিপ্ৰেক্ষিতত চৰকাৰে নৱ বৰ্ষৰ উদযাপন যিমান পাৰি অনুষ্টুপীয়াকৈ অনুষ্ঠিত কৰাৰ আহ্বান জনাইছে।
দেশত বিগত কুৰিটা দিনত কোভিডত আক্ৰান্ত লোকৰ সংখ্যা ১০ হাজাৰৰ তলত আছে যদিও অমিক্ৰকনৰ সংক্ৰমণে চৰকাৰ চিন্তিত কৰি তোলা পৰিলক্ষিত হৈছে।
কোভিডৰ ডেল্টা প্ৰজাতিতকৈও অতি দ্ৰুত ভাবে অমিক্ৰন প্ৰজাতিৰ সংক্ৰমণ ঘটিবলৈ লোৱা বুলি বিশ্ব স্বাস্থ্য সংস্থায়ো প্ৰকাশ কৰিছে।
উল্লেখ্য কিছুদিন পূৰ্বে ব্ৰিটেইনত মৃত্যু ঘটিছিল বিশ্বৰ প্ৰথমগৰাকী অমিক্ৰন আক্ৰান্ত ৰোগীৰ । ব্ৰিটেইনৰ প্ৰধানমন্ত্ৰী বৰিছ জনছনে এই কথা প্ৰকাশ কৰিছিল।
এই মৃত্যুৰ খবৰ দি জনছনে অমিক্ৰনক ভাইৰাছক সহজ ভাবে গ্ৰহণ নকৰিবলৈ সকলোকে আহ্বান জনাইছিল। তেওঁ সকলোকে কোভিডৰ বুষ্টাৰ ভেকচিন গ্ৰহণৰো পৰামৰ্শ আগবঢ়াইছিল।
কোভিডক ৰুধিবলৈ ভাৰতকে ধৰি বিশ্বৰ বহু কেই খন দেশে ভেকচিন প্ৰদানৰ প্ৰক্ৰিয়া যুদ্ধকালীন তৎপৰতাৰে চলাই গৈছে যদিও ঘনাই চৰিত্ৰ সলনি ঘটোৱা ক’ৰ’না ভাইৰাছৰ নতুন নতুন প্ৰজাতিয়ে আনকি ভেকচিনকো কেৰেপ নকৰা হৈছে।
কোভিডৰ ভেকচিনে কাবু কৰিব নোৱাৰা তেনে এক প্ৰজাতিৰ ক’ৰ’না ভাইৰাছ দক্ষিণ আফ্ৰিকাত উদ্ভৱ ঘটি এতিয়া বিশ্বৰ বিভিন্ন দেশত বিয়পি পৰিছে। কোভিডৰ এই নতুন প্ৰজাতিটোৱে ত্ৰাসৰ সৃষ্টি কৰাৰ পৰিপ্ৰেক্ষিততে এছিয়া আৰু ইউৰোপৰ দেশসমূহে গ্ৰহণ কৰিছে কঠোৰ সতৰ্কতামূলক ব্যৱস্থা।
