অহা ১০ মে’ৰ দিনা মুখ্যমন্ত্ৰী হিমন্ত বিশ্ব শৰ্মা নেতৃত্বাধীন বিজেপি চৰকাৰৰ এটা বছৰ সম্পূৰ্ণ হ’ব।
হিমন্ত বিশ্ব শৰ্মা চৰকাৰৰ এবছৰীয়া কাৰ্য্যকালৰ মূল্যায়ন কৰে তৃণমূল কংগ্ৰেছৰ ৰাজ্যিক সভাপতি ৰিপুন বৰাই।
এটা বছৰত হিমন্ত বিশ্ব শৰ্মা চৰকাৰ বিফল বুলি দাবী কৰি ৰিপুন বৰাই কয় “চৰকাৰে বিৰাট জাকজমকতাৰে প্ৰথম বৰ্ষপূৰ্তিৰ আয়োজন কৰিছে৷ ৰাইজে খাবলৈ পোৱা নাই৷ মন্ত্ৰীসকলে কাজিৰঙাৰ বিলাসী হোটেলত গৈ খাইছেগৈ৷ বৰ্তমান চৰকাৰখনে ৰাইজক কি সফলতাৰ কথা ক’ব? যি মূলা বাঢ়ে তাৰ দুপাততে চিন৷ এটা বছৰতে দেখা গ’ল চৰকাৰখনে কি কৰিব”।
“এটা বছৰতে ৰাজ্যৰ অৰ্থনীতি বিধ্বস্ত কৰিছে৷ এনে হ’লে শ্ৰীলংকাতকৈ আমাৰ অৱস্থা বেয়া হ’ব”। মুখ্যমন্ত্ৰী হিমন্ত বিশ্ব শৰ্মা নেতৃত্বাধীন বিজেপি চৰকাৰক কটাক্ষ কৰি এইদৰে কয় ৰিপুন বৰাই।
তেওঁ লগতে কয় “চৰকাৰে ঋণৰ পিচত ঋন ধাৰৰ পিচত ধাৰ ল’ব লগাত পৰিছে৷ সোণোৱালৰ পৰা বৰ্তমানলৈ ১ লাখ ৮ হাজাৰ কোটি টকা অসমৰ ঋণ হ’ল৷ ইয়াৰ বাহিৰেও কেন্দ্ৰই ১৬ হাজাৰ কোটি টকাৰ ঋণ দিয়াৰ কথা কৈছে৷ চৰকাৰে ঋণৰ সুদ দিওতেই যাব৷ উন্নতি ক’ৰ পৰা হ’ব৷ চৰকাৰে কি বৰ্ষপূৰ্তি পাতিব?”
ইপিনে, বাৰিষা অহাৰ পাছতো মথাউৰি নিৰ্মাণৰ কাম সম্পূৰ্ণ হোৱা নাই বুলি দাবী কৰি তেওঁ লগতে কয় “কাৰণ ১৭ হাজাৰ কোটি টকা ঠিকাদাৰসকলক দিব আছে৷ ঠিকাদাৰক টকা নিদিলে সকলো উন্নয়নমূলক কাম বন্ধ হৈ যাব। ভিজন ডকুমেণ্টত অসমক বানমুক্ত কৰিম বুলি কৈছিল৷ বান মুক্ত কৰিবৰ বাবে চৰকাৰ খনে কি কি কাম কৰিলে”?
মুখ্যমন্ত্ৰীয়ে প্ৰধানমন্ত্ৰীৰ ওচৰত প্ৰতিবাদ কৰিব নোৱাৰে বুলি তেওঁ দাবী কৰি লগতে কয় “ ১৯৬৯ ৰ পৰা আমি বিশেষ ৰাজ্যৰ মৰ্যাদা পাই আহিছিলো৷ মোদী চৰকাৰে বিশেষ ৰাজ্যৰ মৰ্যাদা কৰ্তন কৰাৰ ফলত ৯ হাজাৰ কোটি টকা হেৰুৱালো৷ অহা জুন মাহৰ পৰা GSTৰ ক্ষতিপূৰণ দিয়া বন্ধ কৰাৰ কথা কৈছে৷
ইয়াৰোপৰি, অসম খনক অৰ্থনৈতিক সংকটৰ ফালে লৈ গৈছে বুলি দাবী কৰি বৰাই আৰু কয় “সকলো ৰাজ্যৰ তুলনাত অসমৰ জনমুৰি আয় সকলোতকৈ তলত৷ ১ লাখ ৫ হাজাৰ ৪৫৪ টকা অসমৰ জনমূৰী আয়৷ ত্ৰিপুৰাৰ জনমূৰী আয়ো আমাতকৈ বেছি৷
ইপিনে, শপত গ্ৰহণৰ সময়ত হিমন্ত বিশ্ব শৰ্মাই এবছৰৰ ভিতৰত ১ লাখ নিযুক্তি গণি গণি দিম বুলি দিয়া প্ৰতিশ্ৰুতিৰ কথা সোঁৱৰাই দি বৰাই লগতে কয় “এনে কথা কোৱাত মুখ্যমন্ত্ৰী খুবেই পাকৈত। তেওঁ গণি গণি ক’ব পাৰিবনে কিমান চাকৰি দিলে? তেওঁ মাত্ৰ ১১৫৭টা চাকৰিহে দিছে”৷
