সদ্য সমাপ্ত জাকাৰ্টা এছিয়ান গেইমছত এটা সোণ আৰু দুটা ৰূপৰ পদক অৰ্জন কৰি দেশবাসীক গৌৰৱান্বিত কৰা অসম কন্যা হিমা দাসৰ লগতে প্ৰতিযোগিতাখনত সফলতা লাভ কৰা ভাৰতীয় দলটোক মঙলবাৰে নতুন দিল্লীত কেন্দ্ৰীয় চৰকাৰে সম্বৰ্ধনাৰ লগতে উষ্ম আদৰণি জনায়।
উল্লেখ্য যে সোমবাৰে নিশা ইণ্ডোনেছিয়াৰ জাকাৰ্টাৰ পৰা আহি নতুন দিল্লীত উপস্থিত হৈছে হিমা দাসৰ সৈতে ভাৰতীয় খেলুৱৈৰ দলটো। নতুন দিল্লীত উপস্থিত হোৱাৰ লগে লগে শুভাকাংক্ষীসকলে হিমাৰ লগতে ভাৰতীয় দলটোক আদৰণি তথা শুভেচ্ছা জনোৱা পৰিলক্ষিত হয়।
সম্বৰ্ধনা অনুষ্ঠানত কেন্দ্ৰীয় গৃহ মন্ত্ৰী ৰাজনাথ সিঙৰ লগতে কেন্দ্ৰীয় ক্ৰীড়া মন্ত্ৰী ৰাজ্যবৰ্ধন সি ৰাথোৰো উপস্থিত আছিল।
বৰ্তমান দিল্লীত বাহৰ পাতি থকা অসম কন্যা হিমা দাসৰ লগতে অন্য খেলুৱৈসকলে আজি প্ৰধান মন্ত্ৰী নৰেন্দ্ৰ মোদীক সাক্ষাৎ কৰিব বুলি জানিব পৰা গৈছে।
অৱশ্যে, জাকাৰ্টাত চমকপ্ৰদ প্ৰদৰ্শন আগবঢ়োৱা হিমা নতুন দিল্লীত উপস্থিত হোৱাৰ পাছতে অসম এথলেটিক সংস্থাৰ সভাপতি ৰকিবুল হুছেইনে হোটেল অশোকাত এথলীটগৰাকীক সাক্ষাৎ কৰি অভিনন্দন জ্ঞাপন কৰে।
উল্লেখযোগ্য যে ভাৰতীয় এথলেটিকছৰ মুখ্য প্ৰশিক্ষক বাহাদুৰ সিঙেও হিমাৰ সফলতাক লৈ যথেষ্ট আনন্দিত বুলি সাংবাদিকৰ আগত মত ব্যক্ত কৰে। তেওঁ কয় যে এতিয়া অলিম্পিকৰ বাবে হিমাই লক্ষ্য স্থিৰ কৰা উচিত। কঠোৰ অনুশীলন আৰু একাগ্ৰতাৰ যোগেদিহে অলিম্পিকত পদক অৰ্জন কৰিব পৰা যায়। তেওঁ লগতে কয় যে হিমাৰ ভৱিষ্যৎ উজ্জ্বল। হিমাই অলিম্পিকত নিশ্চিতভাৱে পদক লাভ কৰিবলৈ সক্ষম হ’ব।
