বোকাখাতত দেওবাৰে নিশা ৰন্ধন গেছৰ দুটা চিলিণ্ডাৰসহ এখন মটৰ চাইকেল চুৰি হয়। চোৰে মটৰ চাইকেল লৈ বোকাখাতৰে কুৰুৱাবাহী হৈ গৈ থাকোতে স্থানীয় গাওঁ ৰক্ষী বাহিনীয়ে চোৰক কৰায়ত্ত কৰি বোকাখাত আৰক্ষীক চমজাই দিয়ে ৷
জানিব পৰা মতে, বোকাখাতৰ বৰা গাঁৱৰ মেনন বৰুৱাৰ ঘৰৰ পৰা চিলিণ্ডাৰসহ এ এছ ০৫-ডি-৩৯৪৩ নম্বৰৰ মটৰ চাইকেলখন চাদ্দাম আহমেদ নামৰ চোৰটোৱে কৌশলেৰে চুৰি কৰি নিছিল। পুৱা মেনন বৰুৱাই মটৰ চাইকেল আৰু চিলিণ্ডাৰ দুটা নেদেখি বিচাৰ খোচাৰ কৰে ৷ কিন্তু ক’তো বিচাৰি নাপাই বোকাখাত আৰক্ষীক খবৰ দিয়ে ৷
ইপিনে বোকাখাত আৰক্ষীয়ে অভিযান আৰম্ভ কৰাৰ লগতে গাঁওৰক্ষী বাহিনীকো খবৰ দিয়ে ৷ আজি পুৱাৰ ভাগত কুৰুৱাবাহীত চাদ্দাম আহমেদে চিলিণ্ডাৰসহ মটৰ চাইকেলখন ঠেলি নি থকা অৱস্থাত সন্দেহ হোৱাত গাওঁৰক্ষী বাহিনীয়ে সোধা পোছা কৰে ৷ প্ৰথমে মটৰ চাইকেলত তেল নাই বুলি কৈছিল যদিও অধিক সোধা পোছা কৰাত উৰহি গছৰ ওৰ ওলাই পৰে ৷
ইয়াৰ পাছতে গাঁওৰক্ষী বাহিনীয়ে মটৰ চাইকেল আৰু চিলিণ্ডাৰ সহ চাদ্দাম আহমেদক বোকাখাত আৰক্ষীক গতাই দিয়ে ৷ উল্লেখ্য যে আটক চাদ্দামে নিশা বোকাখাতৰ এইচ ডি এফ চি বেংকৰ এ টি এমত চুৰি কৰিবলৈ চেষ্টা কৰি থকাৰ সময়তে নিশা তহলদাৰী আৰক্ষীয়ে দেখি খেদি যায় যদিও আন্ধাৰৰ সুযোগ লৈ পলায়ন কৰে আৰু পাচত চিলিণ্ডাৰসহ মটৰ চাইকেল চুৰি কৰাৰ কথা স্বীকাৰ কৰিছে ৷
চুৰি কৰি নিয়া ৰন্ধন গেছৰ চিলিণ্ডাৰ আৰু মটৰ চাইকেল সহ চোৰ চাদ্দাম আহমেদ সম্প্ৰতি বোকাখাত থানাৰ আলহী ৷ বৰ্তমান আৰক্ষীয়ে মটৰ চাইকেল চোৰ চাদ্দাম আহমেদক জেৰা কৰি আছে।
