শুকুৰবাৰে মধ্য মুম্বাইৰ এটা ৬১ মহলীয়া আৱাসিক ভৱনত অগ্নিকাণ্ড সংঘটিত হয়।
মধ্য মুম্বাইৰ কুৰে ৰোডৰ ৬১ মহলীয়া গগণচুম্বী ৱান আভিঘ্না পাৰ্ক ভৱনৰ ১৯ মহলাত জুইয়ে চানি ধৰাৰ ফলত চাঞ্চল্যৰ সৃষ্টি হয়।
বৃহন্মুম্বাই পৌৰ নিগমৰ (BMC) বিষয়াসকলে জনোৱা মতে, শুকুৰবাৰে মুম্বাইৰ পেৰেল অঞ্চলত সংঘটিত এই অগ্নিকাণ্ডত এজন ৩০ বছৰীয়া ব্যক্তি আঘাতপ্ৰাপ্ত হৈ মৃত্যুবৰণ কৰে।
মুম্বাই অগ্নি নিৰ্বাপক বিভাগৰ মতে মৃত ব্যক্তিজন ভৱনটোৰ ১৯ তম মহলাৰ পৰা তললৈ বাগৰি পৰিছিল। মৃত ব্যক্তিজন অৰুণ তিৱাৰী বুলি চিনাক্ত কৰা হৈছে।
মুম্বাইৰ মেয়ৰ কিশোৰী পেডনেকাৰ আৰু অন্যান্য বিষয়াসকল ঘটনাস্থলীত উপস্থিত হয়।
অতি কমেও ১২ টা অগ্নি নিৰ্বাপক ইঞ্জিন আৰু পানীৰ টেংকাৰ ঘটনাস্থলীত উপস্থিত হৈছে। দুৰ্ঘটনাস্থলীত বৰ্তমান অনুসন্ধান আৰু উদ্ধাৰ অভিযান চলি আছে।
অগ্নিকাণ্ডৰ কাৰণ এতিয়াও জানিব পৰা হোৱা নাই বুলি অগ্নি নিৰ্বাপক বিষয়া সকলে জানিবলৈ দিছে।
