কলিয়াবৰৰ বুঢ়াপাহাৰৰ সমীপৰ দেওচুৰত সংঘটিত হৈছে এক ভয়ংকৰ পথ দুৰ্ঘটনা। ট্ৰাকত খুন্দা মাৰি জ্বলি উঠিল হুণ্ডাই ভেনো। শিশুসহ ভেনোখনৰ ৫ লোক আহত হোৱাৰ লগতে এজন লোক নিহত হৈছে।
নিহতজন জখলাবন্ধা ঠাকুৰবাৰীৰ চন্দন বাচাৰ(৫০)। নিজৰ ভাতৃৰ জোৰণ দিবলৈ গৈ এইদৰে দুৰ্ঘটনাত নিহত হ’ল লোকজন।
শিশুসহ ভেনোখনৰ অন্য পাঁচজন লোক আহত হয়। আহত সকল হ’ল- নন্দন বাচাৰ(৫৫), সুজিত বাচাৰ(৪২), চুমা বাচাৰ(৩৬), দীপা পাল(৪৮) আৰু এবছৰীয়া নীৰৱ বাচাৰ।
দুৰ্ঘটনাগ্ৰস্ত ভেনো খনৰ নম্বৰ এ এছ ০১ ই এক্স ২৫১৫ আৰু ট্ৰাকখনৰ নম্বৰ এ এছ ০১ এন চি ২৯৫১।
উল্লেখ্য যে, জখলাবন্ধাৰ ঠাকুৰবাৰীৰ পাপু বাচাৰ নামৰ যুৱকজনৰ বিবাহ উপলক্ষে জোৰণৰ অনুষ্ঠানত অংশ ল’বলৈ হুণ্ডাই ভেনো বাহনখনত জখলাবন্ধাৰ পৰা কুঠৰীৰ কইনা গৃহলৈ যাত্ৰা কৰিছিল বাচাৰ পৰিয়ালৰ ৬ জন লোক।
লগতে পঢ়ক: মুম্বাইৰ বহু মহলীয়া অট্টালিকাত ভয়ংকৰ অগ্নিকাণ্ড; কমেও ৭জন লোকৰ মৃত্যু, আহত ১৫জন
বুঢ়াপাহাৰৰ সমীপৰ দেওচুৰত ৩৭ নং ৰাষ্ট্ৰীয় ঘাইপথত এখন ট্ৰাকক অ’ভাৰটেক কৰিবলৈ গৈ ট্ৰাকখনত খুন্দা মাৰে বাহনখনে।
এই দুৰ্ঘটনাটোৰ কিছু সময়ৰ পিছতে দাউ দাউকৈ জ্বলি উঠে ভেনো বাহনখন। অৱশ্যে বাহনখন জ্বলি উঠাৰ পূৰ্বে বাহিৰ কৰা হয় লোক কেইজনক।
স্থানীয় লোকৰ সহযোগত লোককেইজনক জখলাবন্ধা চিকিৎসালয়ত ভৰ্তি কৰা হয় যদিও তাৰে চন্দন বাচাৰ নামৰ লোকজনক নিহত বুলি ঘোষণা কৰে চিকিৎসকে।
আনহাতে, আহতসকলক উন্নত চিকিৎসাৰ বাবে তেজপুৰ চিকিৎসামহাবিদ্যালয় হস্পিতাললৈ প্ৰেৰণ কৰা হয়।
ইফালে, এই দুৰ্ঘটনাৰ বাতৰি সংগ্ৰহ কৰিবলৈ যোৱা অৱস্থাত দুৰ্ঘটনাত পতিত হয় কলিয়াবৰৰ এজন সাংবাদিক গৌতম বৰা।
নিজৰ ৱেগ’নাৰ খনৰে বাতৰি সংগ্ৰহ কৰিবলৈ যোৱাৰ সময়ত জখলাবন্ধাৰ বাঘজানত এখন ট্ৰাকৰ লগত সংঘৰ্ষ হয়। দুৰ্ঘটনাত গুৰুতৰভাৱে আহত হয় সাংবাদিক গৌতম বৰা। আহত সাংবাদিকজনক উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়।
