বাংলাদেশৰ ৰাজধানী ঢাকাত সংঘটিত হৈছে এক ভয়াৱহ দুৰ্ঘটনা। ঢাকাৰ ওচৰৰ এখন নদীত মালবাহী জাহাজৰ খুন্দাত দুৰ্ঘটনাত পতিত হৈছে এখন সৰু যাত্ৰীবাহী ফেৰী।
দুৰ্ঘটনাত কমেও পাঁচজন লোক নিহত লগতে দহজনতকৈ অধিক লোক সন্ধানহীন হৈছে বুলি জানিব পৰা গৈছে।
আৰক্ষীয়ে জানিবলৈ দিয়া মতে ঢাকাৰ দক্ষিণ-পূবৰ শীতলাক্ষ্য নদীত এম ভি ৰুপোচি-৯ আভ্যন্তৰীণ কাৰ্গো কেৰিয়াৰে সৰু জাহাজখনত খুন্দা মৰাৰ পিছত প্ৰায় ২২ জন লোকে সাঁতুৰি পাৰলৈ আহিবলৈ সক্ষম হৈছিল।
স্থানীয় সংবাদ মাধ্যমৰ দ্বাৰা সম্প্ৰচাৰিত ফুটেজত দেখা গৈছে যে মালবাহী জাহাজখন ফেৰীৰ সৈতে সংঘৰ্ষ হোৱাৰ লগে লগে ফেৰীখনত থকা যাত্ৰীসকল আতংকিত হৈ পৰিছিল।
ফেৰীখন দ্ৰুতগতিত ডুব যোৱাৰ ফলত বহু যাত্ৰীয়ে নদীত জপিয়াই দিয়া ভিডিঅ’টোত দেখিবলৈ পোৱা গৈছে।
এজন আৰক্ষী বিষয়াই কয়, “আমি পাঁচটা মৃতদেহ উদ্ধাৰ কৰিছো। ২২ জন লোকক নদীৰ পাৰত সুৰক্ষিতভাৱে উদ্ধাৰ কৰিছো।”
এজন শীৰ্ষ আৰক্ষী বিষয়াই জানিবলৈ দিয়ে যে দুৰ্ঘটনাটোৰ সময়ত ফেৰীখনে ৬০ জনতকৈও অধিক লোকক কঢ়িয়াই নিছিল।
জিলা প্ৰশাসক মঞ্জুৰুল হাফিজে জানিবলৈ দিয়া অনুসৰি উপকূলৰক্ষী বাহিনীৰ কৰ্মী আৰু ডুবাৰুসকলে বৰ্তমান উদ্ধাৰ অভিযান অব্যাহত ৰাখিছে।
