যোৱা ১৬ আগষ্টত জম্মু-কাশ্মীৰৰ পহেলগামত সংঘটিত হোৱা শোকাৱহ বাছ দুৰ্ঘটনাত আঘাতপ্ৰাপ্ত আন এগৰাকী ইণ্ডো-টিবেটান সীমান্ত আৰক্ষীৰ (আইটিবিপি) জোৱানৰ সোমবাৰে নিশা মৃত্যু হয়।
ইয়াৰ লগে লগে দুৰ্ঘটনাটোত নিহত জোৱানৰ সঃখ্যা আঠ গৰাকীলৈ বৃদ্ধি পালে। ইতিপূৰ্বে এই ভয়াৱহ দুৰ্ঘটনাটো সংঘটিত হোৱাৰ দিনাই সাতজন সেনা জোৱানৰ মৃত্যু হৈছিল।
কালি মৃত্যু হোৱা জোৱানগৰাকীক চতুৰ্থ বেটেলিয়নৰ সহকাৰী উপ-পৰিদৰ্শক (এএছআই) নন্দন সিং বুলি চিনাক্ত কৰা হৈছে। দুৰ্ঘটনাটোৰ পিছত গুৰুতৰভাৱে আঘাতপ্ৰাপ্ত হোৱা সিঙক শ্ৰীনগৰৰ এছকেআইএমএছ চিকিৎসালয়ত ভৰ্তি কৰোৱা হৈছিল।
উল্লেখ্য যে যোৱা ১৬ আগষ্টত জম্মু-কাশ্মীৰৰ পহেলগাম অঞ্চলত ৩৯ জন সেনা জোৱান কঢ়িয়াই নিয়া এখন বাছ নদীত পৰি যোৱাৰ ফলত এই শোকাৱহ দুৰ্ঘটনা সংঘটিত হৈছিল।
এই সৈনিকসকলক অমৰনাথ যাত্ৰাৰ নিৰাপত্তাৰ বাবে নিয়োজিত কৰা হৈছিল। বাছেৰে গন্তব্যস্থানলৈ গৈ থকাৰ সময়তে যাত্ৰাপথতে এই দুৰ্ঘটনা সংঘটিত হৈছিল।
বাছখনৰ ব্ৰেক বিকল হোৱাৰ বাবেই এই দুৰ্ঘটনাটো সংঘটিত হোৱা বুলি জানিব পৰা গৈছিল। দুৰ্ঘটনাৰ পিছতে আহতসকলক বিমানেৰে শ্ৰীনগৰৰ সেনা চিকিৎসালয়লৈ লৈ যোৱা হৈছিল।
আনহাতে ইণ্ডো-টিবেটান সীমান্ত আৰক্ষী (আইটিবিপি)- এ দুৰ্ঘটনা সন্দৰ্ভত অনুসন্ধানৰ বাবে তদন্ত সমিতি গঠন কৰিছিল।
