পূজাৰ বতৰত স্বাভাৱিকতে দেখা যায় বস্ত্ৰৰ বিপনী সমূহত গ্ৰাহকৰ ভিৰ।
কিন্তু যোৱা কেইবছৰমানৰ পৰা দেখা গৈছে বস্ত্ৰৰ বিপনীসমূহত গ্ৰাহকৰ ভিৰ হ্ৰাস পাইছে ।
ফলত স্থায়ী বস্ত্ৰৰ ব্যৱসায়ীসকলে মূৰে কপালে হাত দিব লগা হৈছে।
উৎসৱ বুলিলে স্বাভাৱিকতে বস্ত্ৰ ব্যৱসায়ীসকলে অন্যান্য সময়ৰ তুলনাত অধিক বস্ত্ৰ বিক্ৰী কৰিবলৈ সক্ষম হয় ,কিন্তু বৰ্তমান দেশৰ পৰিস্থিতি তথা অনলাইন শ্বপিঙে বিশেষকৈ এই পূজাৰ সময়তো বস্ত্ৰ ব্যৱসায়ী সকললৈ দুৰ্যোগ নমাই আনিছে।
অতি সম্প্ৰতি স্থায়ী ব্যৱসায়ীৰ দোকানৰ পৰা সামগ্ৰী ক্ৰয় কৰাতকৈ নিজৰ পছন্দৰ সামগ্ৰী অনলাইনত অৰ্ডাৰ কৰি সুলভ মূল্যত ক্ৰয়ৰ প্ৰৱণতা বৃদ্ধি পাইছে ।
এই ক্ষেত্ৰত নৱ প্ৰজন্মৰ যুৱক-যুৱতী সকলৰ অন লাইন শ্বপিংৰ প্ৰতি অধিক আকৰ্ষিত হোৱাত মাধমাৰ পৰিছে পৰম্পৰাগত স্থায়ী ব্যৱসায়ী সকলৰ ওপৰত।
ইপিনে সামগ্ৰীৰ মূল্য কম হোৱাৰ উপৰি ঘৰতে সামগ্ৰী পদ পোৱাৰ সুযোগ লাভ কৰাৰ বাবে অনলাইন শ্বপিংৰ প্ৰতি অধিকাংশৰ আকৰ্ষণ বৃদ্ধি পোৱাত আজি পূজাৰ সময়তো অনলাইনত ক্ৰয় কৰা সামগ্ৰী বিতৰণ কেন্দ্ৰত গ্ৰাহকে অৰ্ডাৰ দিয়া এটা দিনৰ সামগ্ৰীৰ দ’ম আৰু এই সামগ্ৰী সমূহ গ্ৰাহকৰ কাষলৈ নিবৰ বাবে সমবেত হোৱা বিতৰকৰ ভিৰ।
ইয়াৰ বিপৰীতে পৰম্পৰাগত সামগ্ৰী আৰু বস্ত্ৰৰ দোকানত গ্ৰাহকৰ সেৰেঙা উপস্থিতি পূজাৰ সময়তো।
অৱশ্যে এই অনলাইন শ্বপিং ব্যৱস্থাত স্থানীয় বহুতো শিক্ষিত নিবনুৱা যুৱক যুৱতীৰ সংস্থাপন হৈছে।
হয়, এই ব্যৱস্থা অতিকৈ ইতিবাচক যদিও এনেদৰে চলি থাকিলে স্থানীয় স্থায়ী বস্ত্ৰ ব্যৱসায়ীসকলৰ ভৱিষ্যত কোন দিশে গতি কৰিব সেয়া সময়ত লক্ষ্যণীয় হ’ব।
