পশ্চিম বংগত চিকিৎসকৰ ওপৰত নিৰ্মমভাৱে হোৱা আক্ৰমণৰ প্ৰতিবাদত আজি সমগ্ৰ দেশজুৰি চিকিৎসালয়সমূহ বন্ধ থাকিব। আজি পুৱা ৬ বজাৰ পৰা কাইলৈ অৰ্থাৎ ১৮ জুনৰ পুৱা ৬ বজালৈকে বন্ধ থাকিব চিকিৎসালয়মূহ। এই কৰ্মবিৰতি ঘোষণা কৰিছে ইণ্ডিয়ান মেডিকেল এছ’চিয়েশ্যনে। সমান্তৰালভাৱে ইয়াৰ প্ৰভাৱ অমসতো পূৰ্ণভাৱে পৰিব।
ইণ্ডিয়ান মেডিকেল এছ’চিয়েশ্যনৰ এই কৰ্মবিৰতি কাৰ্যসূচীলৈ সমৰ্থন আগবঢ়াইছে অসমৰ চিকিৎসক সমাজেও। জি এম চি এইচ কনিষ্ঠ চিকিৎসক সন্থাই এই দেশজোৰা ধৰ্মঘটলৈ সমৰ্থন জনাইছে। মহানগৰীৰ জি এম চি হাস্পতাল আৰু এম এম চি হাস্পতালৰ বহিঃবিভাগ আৰু অন্তঃবিভাগত আজি ২ বজালৈকে কোনো সেৱা আগ নবঢ়ায় চিকিৎসকসকলে। এই সময়ছোৱাত কেৱল জৰুৰীকালীন চিকিৎসা সেৱাহে খোলা থাকিব।
গুৱাহাটী মেডিকেল কলেজ শিক্ষক সন্থাৰ সভাপতি অধ্যাপক আৰতি ডেকাই জনোৱা মতে জি এম চি হাস্পতালৰ চিকিৎসক সকলে আজি ক’লা বেজ পৰিধান কৰি দিনৰ ১১ বজাৰ পৰা অধীক্ষকৰ কাৰ্যালয়ৰ সন্মুখত এক প্ৰতীকী প্ৰতিবাদ কৰিব।
ইফালে পশ্চিম বংগত অব্যাহত থকা প্ৰতিবাদৰ মাজতে কনিষ্ঠ চিকিৎসকসকলৰ দাবীক লৈ আজি ৩ বজাত মুখ্যমন্ত্ৰী মমতা বেনাৰ্জীয়ে সকলো মেডিকেল কলেজৰ প্ৰতিনিধিৰ সৈতে বৈঠকত বহিব বুলি জানিব পৰা গৈছে।
