শেহতীয়াকৈ কয়লা চিণ্ডিকটকলৈ ৰাজ্যৰ ৰাজনীতি গৰম হৈ থকাৰ সময়তে জাতীয় সংগঠনৰ নেতাই কয়লা গাড়ীৰ পৰা ধনদাবী কৰি গ্ৰেপ্তাৰ হ’ব লগা হোৱা খবৰে তিনিচুকীয়া জিলাত চাঞ্চল্যৰ সৃষ্টি হৈছে।
জিলাখনৰ ডিগবৈৰ বৰবিল এলেকাত কয়লা পৰিবাহী ট্ৰাক ৰখাই ধন দাবী কৰাৰ অভিযোগত স্থানীয় আৰক্ষীয়ে কালি নিশা ‘জাতীয়’ সংগঠনৰ দুজনকৈ নেতাক আটক কৰি আজি জে’ললৈ প্ৰেৰণ কৰে।
ধৃত যুৱক দুজনক ‘আহোম সেনা’ৰ বিপ্লৱ গগৈ আৰু অসম জাতীয়তাবাদী যুৱ ছাত্ৰ পৰিষদৰ সদস্য বিশাল দে’ বুলি চিনাক্ত কৰা হৈছে।
আৰক্ষীৰ এক সূত্ৰ মতে উক্ত যুৱক দুজনে একাংশ সতীৰ্থসহ যোৱা শুকুৰবাৰে নিশা প্ৰায় ১১ বজাত ডিগবৈৰ বৰবিলত চোৰাং কয়লা সৰবৰাহ কৰাৰ সন্দেহত ৫খন ট্ৰেলাৰ আগভেতি ধৰিছিল।
যুৱকৰ দলটোৱে ট্ৰেলাৰ কেইখনৰ পৰা বৃহৎ অংকৰ ধন দাবী কৰাৰ লগতে লুটপাত চলাই ড্ৰাইভাৰ হেণ্ডিমেনক প্ৰহাৰ কৰাৰ অভিযোগ তুলি কয়লা ব্যৱসায়ী পক্ষই ডিগবৈ আৰক্ষীক দাখিল কৰা এজাহাৰৰ ভিত্তিত আৰক্ষীয়ে শনিবাৰে বিপ্লৱ গগৈ আৰু বিশাল দে’ক আটক কৰে।
জানিব পৰা মতে, তেওঁলোকে ধন দাবী কৰা কয়লা ভৰ্টি ট্ৰেলাৰকেইখন যোৱা ১৬ অক্টোবৰত যুৱ কংগ্ৰেছৰ এটা দলে ডিগবৈ আৰক্ষী থানাৰ অন্তৰ্গত বগাপানীস্থিত নিৰুপমা পেট্ৰল ডিপুৰ পৰা জব্দ কৰি আৰক্ষীক গতাই দিছিল।
গাড়ীকেইখনৰ নম্বৰ হৈছে পি বি-০৫-এ এল-৫৯৬৭, পি বি-০৫-এ এল-৬৪৫৮, পি বি-০৫-এ কে-৩৩১৩, পি বি-০৫-এ এল-৬৫৫৮ আৰু পি বি-০৫-এ এল-৮৮২৫। আৰক্ষীয়ে গাড়ীকেইখন জব্দ ডিগবৈ থানাত ৰাখিছিল যদিও বিষয়টো আদালতৰ বিচাৰধীন হৈ আছিল আৰু আদালতৰ নিৰ্দেশমৰ্মে শুকুৰবাৰে আৰক্ষীয়ে নিশা গাড়ীকেইখন এৰি দিয়ে।
কিন্তু উক্ত যুৱকৰ দলটোৱে গাড়ীকেইখন ৰখাই ধন দাবী কৰে। নিশাই চন্দন কলিতা নামৰ লোকজনে দাখিল কৰা এজাহাৰৰ ভিত্তিত ডিগবৈ আৰক্ষীয়ে ৩০৪/১৯ নম্বৰত এক গোচৰ ৰুজু কৰি ভাৰতীয় দণ্ডবিধি আইনৰ ৩৯ ধাৰাত বিপ্লৱ গগৈ আৰু বিশাল দে’ক আটক কৰি আজি মাৰ্ঘেৰিটা ন্যায়িক আদালতত দুয়োকে হাজিৰ কৰাই জে’ললৈ প্ৰেৰণ কৰে। উল্লেখ যে ধৃত বিপ্লৱ গগৈৰ পৃতি এজন আৰক্ষী বিষয়া।
