আজি গুৱাহাটীৰ পাণবজাৰত আলফা (স্বাঃ)ই ঘটোৱা বোমা বিস্ফোৰণৰ আচল লক্ষ্য আছিল অসমত হিন্দু বাংলাদেশীক সংস্থাপনৰ দাবীৰে গুৱাহাটীত অভিৱৰ্তন পাতিব খোজা সংগঠনবোৰ। এই গুৰুত্বপূৰ্ণ কথাটো আলফা (স্বাঃ)ৰ সেনাধ্যক্ষ পৰেশ বৰুৱাই বিস্ফোৰণৰ পিছতে সংবাদ মাধ্যমলৈ প্ৰেৰণ কৰা বাৰ্তাত প্ৰকাশ পাইছে।
আলফা (স্বাঃ)ৰ সেনাধ্যক্ষজনৰ ভাষ্যমতে, বিস্ফোৰণটো লক্ষ্যচ্যুত হোৱা বাবেহে কেইজন মান থলগিৰী লোকে আঘাত পালে আৰু সংগঠনটো তাৰ বাবে দুঃখিত।
“হিন্দু বাংলাদেশীক অসমত সংস্থাপন কৰিব খোজা আৰু তাৰ সমৰ্থনত গুৱাহাটীত একত্ৰিত হৈ অভিৱৰ্তন কৰিব খোজা সংগঠনবোৰক লক্ষ্য কৰি আমাৰ পৰিকল্পনা আছে আৰু এই পৰিকল্পনা থাকিবই।” -এইদৰে কয় বৰুৱাই।
উল্লেখযোগ্য যে অহা ১৭ নৱেম্বৰত হিন্দু বাংলাদেশীক অসমত সংস্থাপনৰ সমৰ্থনত গুৱাহাটীত এখন অভিৱৰ্তন পাতিছে ২০টাতকৈ অধিক বাঙালী সংগঠনে।
আজিৰ বাৰ্তাটোৰ জৰিয়তে সেনাধ্যক্ষ বৰুৱাই বিস্ফোৰণটোত আঘাতপ্ৰাপ্ত থলুৱা লোককেইজনৰ আশু আৰোগ্য কামনা কৰিছে।
বিস্ফোৰণটোৰ ফলত ৫জনকৈ লোকে আঘাত পাইছে। আহতকেইজনক পাণবজাৰস্থিত মহেন্দ্ৰমোহন চৌধুৰী চিকিৎসালয়ত ভৰ্তি কৰোৱা হৈছে।
