ভাৰতীয় বতৰ বিজ্ঞান বিভাগে শনিবাৰে সন্ধিয়া প্ৰচণ্ড ধুমুহা আৰু ধাৰাসাৰ বৰষুণৰ সম্ভাৱনাৰ বাবে দিল্লী আৰু এন চি আৰ অঞ্চলৰ বাবে ৰেড এলাৰ্ট জাৰি কৰে। খবৰ পোৱা যায় যে পশ্চিম আৰু উত্তৰ-পশ্চিমৰ পৰা অহা ধুমুহাই ক্ৰমান্বয়ে ৰাজধানী আৰু ইয়াৰ আশে-পাশে থকা অঞ্চলৰ কাষ চাপিছে। ফলত সমগ্ৰ অঞ্চলটো বিধ্বস্ত হোৱাৰ সম্ভাৱনা আছে। এই ধুমুহাই পৰৱৰ্তী এঘণ্টাৰ পৰা দুঘণ্টাৰ ভিতৰত ঘণ্টাত ৪০-৬০ কিলোমিটাৰ বেগত ধুমুহা বতাহ, সঘনাই বজ্ৰপাত আৰু ধূলিময় কৰিব পাৰে বুলি আগজাননী দিয়া হয়।
দেওবাৰে পুৱা প্ৰচণ্ড বতাহ আৰু বজ্ৰপাতৰ লগে লগে ৰাজধানী দিল্লী আৰু এনচিআৰ অঞ্চল প্ৰচণ্ড বৰষুণত বুৰ যায়। যদিও এই বৰষুণে প্ৰচণ্ড গৰমৰ পিছত সকাহ কঢ়িয়াই আনিছিল, তথাপিও ইয়াৰ ফলত তীব্ৰ জটিলতাৰো সৃষ্টি কৰে। ধাৰাসাৰ বৰষুণত ডুব যায় কেইবাটাও পথ আৰু আণ্ডাৰপাছ। যান-জঁটত ভুগিবলগীয়া হৈছে সাধাৰণ ৰাইজ।
বৰষুণৰ ফলত দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত ভয়াৱহ প্ৰভাৱ পৰিছে। বিমানবন্দৰৰ সূত্ৰই জনোৱা মতে, দেওবাৰে পুৱালৈকে ১০০ৰো অধিক বিমান সেৱা ব্যাহত হৈ পৰিছে। ধুমুহাৰ সময়ত কমেও ২৫খন বিমান ডাইভাৰ্ট কৰা হয়।
বতৰ বিজ্ঞান বিভাগে নাগৰিকসকলক ঘৰৰ ভিতৰতে থাকিবলৈ পৰামৰ্শ দিছে। সংস্থাটোৰ বিবৃতিত কোৱা হৈছে যে, “ধুমুহাৰ সময়ত মুকলি ঠাইত, পথাৰত বা গছৰ তলত থিয় নহ’ব। বৈদ্যুতিক সঁজুলি ব্যৱহাৰ কৰাৰ সময়ত সাৱধান হওক আৰু প্ৰয়োজনীয় সাৱধানতা অৱলম্বন কৰক।”
শনিবাৰে সন্ধিয়া ৫:৩০ বজাত দিল্লীৰ আপেক্ষিক আৰ্দ্ৰতা আছিল ৪৯ শতাংশ, যিটো এই ধৰণৰ বতৰৰ বাবে অনুকূল বুলি ধাৰণা কৰে বতৰ বিজ্ঞানীসকলে। ইফালে সন্ধিয়া ৬ বজাত কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ তথ্য অনুসৰি ৰাজধানীখনৰ বায়ুৰ গুণাগুণ ‘মধ্যমীয়া’ আছিল, একিউআই আছিল ১৪১।
সমগ্ৰ দিল্লী আৰু এনচিআৰত এই ধুমুহা আৰু বৰষুণৰ ফলত গছ উভালি পৰা, বিদ্যুৎ বিচ্ছিন্ন হোৱাৰ লগতে পথত পানী জমা হোৱাৰ আশংকা আছে। বায়ুৰ গুণাগুণ বেয়া হ’ব পাৰে, যাৰ ফলত শ্বাস-প্ৰশ্বাসজনিত সমস্যা থকা ৰোগীৰ সমস্যা হ’ব পাৰে। এই ধুমুহাই গুৰুগ্ৰাম, ফৰিদাবাদ, নয়দা আৰু গাজিয়াবাদত প্ৰভাৱ পেলাব পাৰে বুলিও আই এম ডিয়ে প্ৰকাশ কৰে।
বতৰৰ পৰিস্থিতিৰ সৈতে মোকাবিলা কৰিবলৈ সাজু হৈছে দিল্লী চৰকাৰ আৰু এনচিআৰ প্ৰশাসন। স্থানীয় পৌৰসভাসমূহক নলা আৰু নৰ্দমা পৰিষ্কাৰ কৰিবলৈ নিৰ্দেশ দিয়া হৈছে। বিদ্যুৎ যোগানৰ যাতে কোনো সমস্যা নহয় তাৰ বাবে বিদ্যুৎ বিভাগক সতৰ্ক হৈ থাকিবলৈ কোৱা হৈছে। পৰিস্থিতি চম্ভালিবলৈ যান-বাহন আৰু আৰক্ষী বিভাগক সাজু হ’বলৈ কোৱা হৈছে। ইয়াৰ উপৰিও অগ্নিনিৰ্বাপক আৰু জৰুৰীকালীন সেৱাও সতৰ্ক হৈ আছে।
আই এম ডিয়ে জনোৱা মতে, যদিও নিশাৰ ফালে ধুমুহা আৰু বৰষুণ কমিছে, তথাপিও আগন্তুক ২৪ ঘণ্টাত মধ্যমীয়াৰ পৰা প্ৰবল বৰষুণৰ সম্ভাৱনা আছে। তাপমাত্ৰা ২৮ৰ পৰা ৩২ ডিগ্ৰী চেলছিয়াছৰ ভিতৰত হ’ব আৰু আৰ্দ্ৰতা আৰু বৃদ্ধি পাব পাৰে। পৰিস্থিতি নিৰীক্ষণ কৰি প্ৰয়োজন হ’লে অধিক সতৰ্কবাণী জাৰি কৰা হ’ব বুলিও উল্লেখ কৰা হৈছে।
