ভয়াৱহ নাটনিৰ সৈতে যুঁজি আছে অসমৰ শিক্ষাৰ্থীসকলে। ৰাজ্যজুৰি বিদ্যালয়-মহাবিদ্যালয় উভয়তে ১৬ হাজাৰৰো অধিক শিক্ষকৰ পদ পূৰণ নোহোৱাকৈয়ে আছে৷ এই উদ্বেগজনক তথ্য প্ৰকাশ কৰিছে অসমৰ শিক্ষামন্ত্ৰী ৰাণোজ পেগুৱে। বিধান সভাৰ অধিৱেশনৰ শেষৰটো দিনত এই তথ্য দাঙি ধৰিছে ৰণোজ পেগুৱে।
অসমৰ বিদ্যালয়সমূহে ১৫,৭৫২ গৰাকী শিক্ষকৰ ঘাটিৰ সন্মুখীন হোৱাৰ বিপৰীতে সমগ্ৰ ৰাজ্যৰ বিভিন্ন মহাবিদ্যালয় আৰু বিশ্ববিদ্যালয়ৰ প্ৰায় ১,৩০০ শিক্ষক পদও খালী হৈ আছে।
উল্লেখ্য যে বৰ্তমান বিদ্যালয়সমূহত অতিৰিক্ত ২,৮৩০টা অশিক্ষকৰ পদ পূৰণ কৰা হোৱা নাই। তদুপৰি বিদ্যালয় আৰু মহাবিদ্যালয় উভয়তে ১৬৮৬টা প্ৰধান শিক্ষকৰ পদ, ৩২০টা অধ্যক্ষৰ পদ, আৰু ৪৯৯টা উপাধ্যক্ষৰ পদকে ধৰি কেইবাটাও মূল প্ৰশাসনিক পদ খালী হৈ আছে।
উচ্চ শিক্ষাৰ ক্ষেত্ৰখনত সমগ্ৰ অসমৰ মহাবিদ্যালয়সমূহত ৮৬০টা সহকাৰী অধ্যাপকৰ পদ পূৰণ নোহোৱাৰ ফলত গুণগত শিক্ষা বজাই ৰখাৰ প্ৰত্যাহ্বান আৰু অধিক ভয়াৱহ হৈ পৰিছে। তদুপৰি অসমৰ চৰকাৰী বিশ্ববিদ্যালয়সমূহে ৪৬৫টা শিক্ষক পদৰ নাটনিৰ সৈতে যুঁজিছে। হিমন্ত বিশ্ব শৰ্মাৰ দিনত এনেদৰেই শিক্ষা বিভাগটোৰ অৱস্থা পয়ালগা হৈ পৰিছে।
