বাংলাদেশী অনুপ্ৰৱেশকাৰীৰ বিৰুদ্ধে অসম চৰকাৰৰ উচ্ছেদ অভিযানৰ প্ৰতি মিশ্ৰিত প্ৰতিক্ৰিয়া দেখিবলৈ পোৱা গৈছে। তেনে পৰিস্থিতিত তিনিচুকীয়া জিলাৰ তাকাম মিছিং পোৰিন কেবাং (টিএমপিকে) আৰু মিছিং মিমাগ কেবাং (এমএমকে) ডিগবৈ সংমণ্ডলৰ লেখাপানী বনাঞ্চলৰ ভিতৰত থকা পাহাৰপুৰলৈ ৪১২টা লাইকা পৰিয়ালক স্থানান্তৰিতকৰণত পলম হোৱাত উদ্বিগ্ন হৈ পৰিছে সাধাৰণ ৰাইজকে ধৰি দল সংগঠনসমূহ।
তিনিচুকীয়া জিলাৰ লেখাপানী বনাঞ্চলৰ ভিতৰত অৱস্থিত পাহাৰপুৰত ৫৭২টা লাইকা পৰিয়ালৰ ভিতৰত ১৬০টা পৰিয়ালক নামফাই টাপুত প্ৰায় ৭২ হেক্টৰ ভূমিত পুনৰ্বাসন কৰা হৈছে। কিন্তু বাকী ৪১২টা পৰিয়াল এতিয়াও পাহাৰপুৰত ১৬৬ হেক্টৰ নিৰ্ধাৰিত ভূমিত স্থানান্তৰৰ অপেক্ষাত আছে। তাকাম মিছিং পৰিন কেবাং (টিএমপিকে)ৰ প্ৰাক্তন উপ-সভাপতি মিণ্টু ৰাজ মৰঙে অভিযোগ কৰিছে যে মুখ্যমন্ত্ৰী হেমন্ত বিশ্ব শৰ্মাৰ নেতৃত্বত চৰকাৰে এই পৰিয়ালসমূহৰ পুনৰ্বাসনত ব্যৰ্থ হৈছে।
মিছিং মিমাগ কেবাং (এমএমকে)ৰ কেন্দ্ৰীয় কাৰ্যবাহী সদস্য মৰাঙে কয়, “পুনৰ্বাসন প্ৰক্ৰিয়া পলমকৈ আৰু অসম্পূৰ্ণভাৱে চলিছে, যাৰ ফলত বহু পৰিয়াল অস্থায়ী শিবিৰত জীৱন-যাপন কৰিবলৈ বাধ্য হৈছে।” তেওঁ চৰকাৰক প্ৰশ্ন উত্থাপন কৰি কয় যে চৰকাৰৰ অধীনৰ ভূমি হ’লেও বন বিভাগে স্থানান্তৰত কিয় আগবাঢ়িব পৰা নাই, আৰু এই বিষয়ত সম্ভাৱ্য দুৰ্নীতিৰ ইংগিত বহন কৰিছে বুলি মত প্ৰকাশ কৰিছে।
বন বিভাগৰ সূত্ৰৰ পৰা জানিব পৰা মতে, পাহাৰপুৰৰ ১৬৬ হেক্টৰ ভূমি দশক দশক ধৰি চাহ খেতিৰ বাবে বেদখল হৈ আছে। ২০২৩ চনৰ জুন মাহত বিশেষ মুখ্য সচিব (বন) এম কে যাদৱে এই অঞ্চল পৰিদৰ্শন কৰি বেদখলৰ পৰিস্থিতিৰ মূল্যায়ন কৰিছিল। সূত্ৰই জানিবলৈ দিয়া মতে, বেদখলকৰা ভূমি মুক্ত কৰাত বন বিভাগৰ ব্যৰ্থতাৰ বাবেই বিগত চাৰি বছৰ ধৰি স্থানান্তৰ প্ৰক্ৰিয়া স্থবিৰ হৈ আছে।
ইফালে, নগা সম্প্ৰদায়ৰ কেইবাটাও জনজাতীয় ছাত্ৰ সংগঠন আৰু স্থানীয় সংগঠনে ১৮৮৬ চনৰ অসম ভূমি আৰু ৰাজহ নিয়মৰ উল্লেখ কৰি পাহাৰপুৰত লাইকা পৰিয়ালৰ পুনৰ্বাসনৰ তীব্ৰ বিৰোধিতা কৰিছে। এনে পুনৰ্বাসনে সামাজিক সম্প্ৰীতি বিঘ্নিত কৰিব, সম্প্ৰদায়ৰ মাজত সংঘাতৰ সৃষ্টি কৰিব আৰু ভূমি আৰু বন নিয়মৰ উলংঘন কৰিব বুলি আশংকা প্ৰকাশ কৰিছে।
ইফালে ২০২৩ চনৰ অক্টোবৰত টাংছা, ছেমা, সোণোৱাল কছাৰী আদি সংগঠনে পাহাৰপুৰত উন্নয়নমূলক প্ৰকল্পৰ বাবে চৰকাৰৰ ই-টেণ্ডাৰক জনগোষ্ঠীয় ভূমিৰ অধিকাৰৰ অৱজ্ঞা বুলি গণ্য কৰি তীব্ৰ সমালোচনা কৰিছিল আৰু ইয়াক বাতিল কৰাৰ দাবী জনাইছিল।
এই বিষয়ত কিছুমান সংগঠনে পুনৰ্বাসনক অধিকাৰভিত্তিক বিষয় হিচাপে সমৰ্থন কৰিলেও, নগা জনজাতীয় গোট আৰু ছাত্ৰ সংগঠনসমূহে নিজৰ স্বাৰ্থ ৰক্ষাৰ বাবে ইয়াৰ তীব্ৰ বিৰোধিতা কৰিছে। অসম চৰকাৰে এই বিৰোধৰ মাজত ক্ষতিগ্ৰস্ত পৰিয়ালৰ প্ৰতি দিয়া প্ৰতিশ্ৰুতি পূৰণ কৰিব পাৰিব নে নাই, সেয়া লক্ষনীয় হ’ব।
