ভাৰতৰ কূটনৈতিক হেঁচাত সেও মানি পাকিস্তানে ইছলমাবাদস্থিত ভাৰতীয় দূতাৱাসৰ দুই কৰ্মচাৰীক মুকলি কৰি দিবলৈ বাধ্য হ’ল।
আজি দিনৰ ভাগত পাকিস্তানে ইছলমাবাদস্থিত ভাৰতীয় উচ্চায়ুক্তৰ হাত অৰ্পণ কৰে দুয়োগৰাকী কৰ্মচাৰীক।
নতুন দিল্লীৰ ছাউথ ব্ল’কৰ সূত্ৰই জনাইছে যে ভাৰতীয় দূতাৱাসৰ আটক হোৱা দুয়োগৰাকী কৰ্মচাৰীৰ শৰীৰত আঘাতৰ চিহ্ন স্পষ্ট হৈ আছে।
পাকিস্তানে দুই কৰ্মচাৰীক মুকলি কৰি দিলে যদিও কিয় আটক কৰা হৈছিল এতিয়াও স্পষ্ট হোৱা নাই।
ছাউথ ব্ল’কৰ সূত্ৰই জনোৱা মতে ভাৰতীয় দূতাৱাসত কৰ্মৰত দুই কৰ্মচাৰীক ইছলমাবাদৰ সচিবালয় থানাত ৰখা হৈছিল।
ইফালে ভাৰতীয় বৈদেশিক মন্ত্ৰালয়ে দিয়া খবৰ অনুসৰি সোমবাৰে পুৱা চিআইএছএফৰ দুই কৰ্মী গাড়ীৰে কৰ্মস্থলীলৈ যোৱাৰ সময়ৰ পৰাই সন্ধানহীন হৈ আছিল।
ইয়াৰ পিছত দিল্লীয়ে খবৰ পোৱা মাত্ৰকে ভাৰতীয় বৈদেশিক মন্ত্ৰালয়ে পাক প্ৰশাসনৰ সৈতে যোগাযোগ কৰে।
সন্ধিয়া খবৰ আহে যে ভাৰতয়ী দূতাৱাসত কৰ্মৰত দুয়োগৰাকী লোকক পাক গুপ্তচৰ সংস্থা আই এছ আইৰ জিম্মাত আছে।
ইফালে পাক সংবাদ মাধ্যমে প্ৰকাশ কৰিছে যে লোক দুজনৰ বাহনখনেৰে এজন পথচাৰীক খুন্দিয়াই পলাবলৈ চেষ্টা কৰাৰ বাবে গ্ৰেপ্তাৰ কৰা হৈছিল।
কিন্তু প্ৰশ্ন হয়, পথচাৰীক খুন্দিওৱাৰ বাবে গ্ৰেপ্তাৰ কৰা লোক দুজন কেনেকৈ পাক গুপ্তচৰ সংস্থা আই এছ আৰ জিম্মাত পালেগৈ?
