পিতৃহাৰা হ’ল অভিনেতা পংকজ ত্ৰিপাঠী

দৰ্শনীয় অভিনয়েৰে চিনেপ্ৰেমীৰ মনত সাঁচ বহুওৱা বলীউডৰ তাৰকা অভিনেতা পংকজ ত্ৰিপাঠীৰ পিতৃৰ আজি মৃত্যু হয়। বাৰ্ধক্যজনিত কাৰণতে মৃত্যু হয় পংকজ ত্ৰিপাঠীৰ পিতৃ পণ্ডিত বেনাৰস তিৱাৰীৰ।

মৃত্যুৰ সময়ত তেওঁৰ বয়স আছিল ৯৯ বছৰ। নিজা জন্মস্থানতে তেওঁৰ অন্ত্যেষ্টিক্ৰিয়া সম্পন্ন কৰা হ’ব বুলি অভিনেতাগৰাকীয়ে জানিবলৈ দিয়ে। ইতিমধ্যে পিতৃক শেষ বিদায় জনাবলৈ জন্মস্থান গোপালগঞ্জলৈ ৰাওনা হৈছে পংকজ ত্ৰিপাঠী।

উল্লেখ্য যে, চলিত মাহৰ আৰম্ভণিতে এক সাক্ষাৎকাৰত অভিনেতাগৰাকীয়ে প্ৰকাশ কৰিছিল যে তেওঁৰ অভিনয় কেৰিয়াৰৰ প্ৰতি তেওঁৰ পিতৃৰ কোনো ধাৰণা নাই।

পংকজ ত্ৰিপাঠীয়ে এই সন্দৰ্ভত উল্লেখ কৰা মতে, তেওঁৰ কৃতিত্বক লৈ তেওঁৰ পিতৃয়ে বেছি গৌৰৱ নকৰে। অভিনেতাগৰাকীয়ে চিনেমাত কি কাম কৰে বা কেনে কাম কৰে, সেই বিষয়েও তেওঁৰ পিতৃ অৱগত নহয়।

নিজৰ সুকীয়া অভিনয়শৈলীৰে ভাৰতীয় দৰ্শকৰ প্ৰিয় অভিনেতা হৈ পৰা অভিনেতাগৰাকীৰ পিতৃয়ে মৃত্যুৰ মুহূৰ্তলৈকে চিনেমাহলত নেদেখিলে তেওঁৰ পুত্ৰৰ নিখুঁত অভিনয়।

কেৱল পুত্ৰৰ বুলিয়েই নহয়, জীৱনত তেওঁ চিনেমা হল এটা ভিতৰৰ পৰা কেনেকুৱা দেখা যায় সেই বিষয়ে জ্ঞাত নহয় বুলি পিতৃ সন্দৰ্ভত জানিবলৈ দিছিল পংকজ ত্ৰিপাঠীয়ে।

উল্লেখ্য যে, প্ৰাৰম্ভিক অৱস্থাত চিনে জগতত নিজকে সংস্থাপন কৰাৰ বাবে পংকজ ত্ৰিপাঠীয়ে যথেষ্ট কষ্ট কৰিবলগীয়া হৈছিল যদিও অধ্যৱসায় আৰু অভিনয়ৰ গুণৰ বলত সম্প্ৰতি তেওঁ বলীউডৰ অন্যতম এক শ্ৰেষ্ঠ অভিনেতা।

পংকজ ত্ৰিপাঠীৰ শেহতীয়া ছবি OMG 2 সম্প্ৰতি চেনিমাহলত। ত্ৰিপাঠীৰ লগতে অক্ষয় কুমাৰ আৰু য়ামি গৌতমৰ অভিনীত ছবিখন এইপৰ্যন্ত ১০০ কোটিৰ সীমা অতিক্ৰম কৰিছে।