ব্ৰেথ এনালাইজাৰ পৰীক্ষাই কোনোবাই মদ্যপান কৰিছে নে নাই তাৰ নিৰ্দিষ্ট প্ৰমাণ দিব নোৱাৰে। এই কথা শেহতীয়াকৈ পাটনা উচ্চ ন্যায়ালয়ে প্ৰকাশ কৰিছে। আইনী বাতৰি ৱেবছাইট ‘বাৰ এণ্ড বেঞ্চ’ৰ এক প্ৰতিবেদনত প্ৰকাশ কৰিছে।
প্ৰায়ে দেখা যায় যে আৰক্ষীয়ে চালক বা পথচাৰীক মুখত নলী থকা যন্ত্ৰ এটা ৰাখি মদ্যপান কৰি আছে নেকি পৰীক্ষা কৰে। কিন্তু পাটনা উচ্চ ন্যায়ালয়ে এই ব্ৰেথ এনালাইজাৰ পৰীক্ষাৰ জৰিয়তে কোনো চূড়ান্ত সিদ্ধান্তত উপনীত হ’ব পৰা যাব নে তাক লৈয়েই প্ৰশ্ন উত্থাপন কৰে।
বিহাৰত দীৰ্ঘদিন ধৰি মদ্যপান, বিক্ৰী আৰু মজুত ৰখাত নিষেধাজ্ঞা আৰোপ কৰা হৈছে। সেই বিহাৰৰ বাসিন্দা নৰেন্দ্ৰ কুমাৰ ৰামক ২০২৪ চনৰ ২ মে’ত মদ সেৱনৰ অভিযোগত গ্ৰেপ্তাৰ কৰা হৈছিল। আৰক্ষীয়ে জনোৱা মতে, বিহাৰৰ কিষানগঞ্জ নিবাসী নৰেন্দ্ৰক মাতাল অৱস্থাত উদ্ধাৰ কৰা হৈছিল।
আৰক্ষীয়ে জনোৱা মতে, ব্ৰেথ এনালাইজাৰ পৰীক্ষাতো মদ্যপানৰ প্ৰমাণ পোৱা গৈছে। বিহাৰ সুৰা নিষেধাজ্ঞা আইনৰ অধীনত নৰেন্দ্ৰৰ বিৰুদ্ধে এফআইআৰ দাখিল কৰা হয়। ইয়াৰ পিছত তেওঁ পাটনা উচ্চ ন্যায়ালয়ৰ কাষ চাপিছিল।
শেহতীয়াকৈ পাটনা উচ্চ ন্যায়ালয়ৰ ন্যায়াধীশ বিবেক চৌধৰীয়ে নৰেন্দ্ৰৰ বিৰুদ্ধে দাখিল কৰা এফআইআৰ খাৰিজ কৰে। উচ্চ ন্যায়ালয়ে লক্ষ্য কৰে যে এজন ব্যক্তিৰ উশাহ-নিশাহত সুৰাৰ গোন্ধ আৰু অসংলগ্ন কথা-বতৰা কেতিয়াও মদ্যপানৰ নিৰ্ণায়ক প্ৰমাণ হ’ব নোৱাৰে। এই সন্দৰ্ভত উচ্চতম ন্যায়ালয়ৰ এক নিৰ্দেশৰ কথাও সোঁৱৰাই দিয়ে পাটনা উচ্চ ন্যায়ালয়ে।
নৰেন্দ্ৰই আদালতত দাবী কৰিছিল যে তেওঁ পেটৰ চিকিৎসাৰ বাবে হোমিঅ’পেথিক ঔষধৰ দোকানলৈ গৈছিল। তাৰ পৰা দিয়া ঔষধত সুৰা থকা বুলিও তেওঁ কয়। নৰেন্দ্ৰই লগতে অভিযোগ কৰে যে তেওঁৰ শৰীৰত সুৰা আছে নে নাই সেইটো প্ৰমাণ কৰিবলৈ কোনো তেজ বা প্ৰস্ৰাৱ পৰীক্ষা কৰা হোৱা নাছিল।
