ৰাইজৰ দলৰ সভাপতি অখিল গগৈয়ে ছায়েদা হামিদৰ বক্তব্যক অসমৰ জাতীয় স্বার্থ বিৰোধী বুলি অভিহিত কৰিছে। সংবাদ মাধ্যমলৈ প্ৰেৰণ কৰা এক বিবৃতিত তেওঁ কয় যে, সংকটৰ এনে সময়ত অদ্ভূত আৰু স্পৰ্শকাতৰ বিষয়ত অসমৰ স্বার্থ বিৰোধী কথা কৈ বিজেপিক সহায় কৰাৰ বাদে আন একো লাভ নাই। অখিল গগৈয়ে সাংবাদিকৰ আগত স্পষ্টভাৱে কয় যে, অসমীয়া জাতিয়ে কোনো বিদেশীৰ বোজা গ্ৰহণ নকৰে।
তেওঁ আৰু কয় যে, অসমীয়া জাতিয়ে হিন্দু হওক বা মুছলমান হওক, যিকোনো বিদেশীৰ বিৰুদ্ধে আছে। অসমত আহি কোনোবাই বিদেশী থাকিলেও কোনো দিগদাৰ নাই বুলি কোৱাটো অসমৰ জাতীয় স্বার্থৰ বিৰোধী বক্তব্য বুলি অখিল গগৈয়ে মত পোষণ কৰে। ৰাইজৰ দলে ছায়েদা হামিদৰ বক্তব্যক গৰিহণা দি এনে উচতনিমূলক বক্তব্য নিদিবলৈ আহ্বান জনায়।
অখিল গগৈয়ে অসমৰ ৰাজনৈতিক ইতিহাস আৰু অসমীয়া মানুহৰ সংগ্ৰাম বুজি উঠিবলৈ আহ্বান জনাইছে। লগতে উদ্যোক্তা সমিতিক অসমৰ ৰাইজক স্পষ্টীকৰণ দিয়াৰ দাবী উত্থাপন কৰিছে।
