ইণ্ডিয়ান আইডল ১২ৰ বিজয়ী তেওঁ। তেওঁৰ গীত শুনিয়েই মুগ্ধ হয় সকলো। তেওঁ হৈছে পৱনদীপ ৰাজন। সোমবৰে (৫ মে’) আহমেদাবাদত গাড়ী দুৰ্ঘটনাত পতিত হয়। পুৱা প্ৰায় ৩:৪০ বজাত গায়কগৰাকীৰ গাড়ীখন এখন ট্ৰাকত খুন্দা মাৰে। গাড়ীত থকা সকলোৱে গুৰুতৰভাৱে আহত হয়।
জানিব পৰা মতে, তেওঁ উত্তৰাখণ্ডৰ ঘৰৰ পৰা আহমেদাবাদৰ কোনো ঠাইলৈ অনুষ্ঠানৰ বাবে গৈ আছিল। কণ্ঠশিল্পীগৰাকীৰ সৈতে আছিল তেওঁৰ বন্ধু অজয় মেহৰা আৰু চালক ৰাহুল সিং। ৰাতিপুৱালৈকে গাড়ীৰ চালকৰ ক্লান্ত হৈ টোপনি আহিল আৰু ফলত দুৰ্ঘটনাটো সংঘটিত হ’ল।
তদন্তত প্ৰকাশ পাইছে যে চালকজনে টোপনি যোৱাৰ ফলত গাড়ীখনৰ ওপৰত নিয়ন্ত্ৰণ হেৰুৱাই এখন ট্ৰাকত খুন্দা মাৰে। দুৰ্ঘটনাত গুৰুতৰভাৱে আহত হয় সকলো। দুৰ্ঘটনাটোৰ পিছতে সকলোকে চৰকাৰী চিকিৎসালয়লৈ লৈ যোৱা হয়। তাৰ পৰা তেওঁলোকক নয়ডাৰ এখন ব্যক্তিগত চিকিৎসালয়লৈ লৈ যোৱা হয়।
কালি ছ’চিয়েল মিডিয়াত ভাইৰেল হোৱা ভিডিঅ’টোত দেখা গৈছে যে পৱনদ্বীপৰ বাওঁ ভৰি আৰু সোঁহাতত আঘাত পাইছে। হস্পিতালৰ বিচনাত পৰি আছে। গোটেই শৰীৰত তেজৰ দাগ। কিন্তু পিছত গম পোৱা গ’ল যে সংগীত শিল্পীগৰাকীয়ে কেৱল হাতখনতে নহয়, দুয়োখন ভৰি আৰু মূৰতো গুৰুতৰভাৱে আঘাত পাইছে।
আৰক্ষীৰ সূত্ৰই জনোৱা মতে, তদন্ত অব্যাহত আছে। অৱশ্যে প্ৰাৰম্ভিক অনুমান অনুসৰি চালকজন ভাগৰুৱা হোৱাৰ বাবেই এই দুৰ্ঘটনা সংঘটিত হয়। এতিয়া সকলো চিকিৎসকৰ তত্বাৱধানত। সকলোৱে যাতে অতি সোনকালে সুস্থিৰ অৱস্থালৈ ঘূৰি আহে তাৰ বাবে চিকিৎসকে চেষ্টা চলাইছে।
উল্লেখ্য যে পৱনদ্বীপৰ ঘৰ উত্তৰাখণ্ডৰ চম্পাৱত জিলাত। মাত্ৰ ২ বছৰ বয়সতে তেওঁ আটাইতকৈ কম বয়সীয়া তবলাবাদকৰ বঁটা লাভ কৰিছিল।পৰিয়ালৰ সকলোৱে সংগীত জগতৰ লগত জড়িত। তেওঁৰ মাক-দেউতাক আৰু ভনীয়েক তিনিওজনেই লোকসংগীতৰ শিল্পী।
২০১৫ চনত ‘দ্য ভইচ ইণ্ডিয়া’ত জয়ী হোৱা পৱনদ্বীপে লাভ কৰিছিল ৫০ লাখ টকা আৰু এখন গাড়ী। তাৰ পিছত ‘ইণ্ডিয়ান আইডল’ত জয়ী হোৱাৰ পিছত তেওঁ সকলোৰে প্ৰিয় হৈ পৰে। পৱনদ্বীপৰ দুৰ্ঘটনাৰ কথা শুনি তেওঁৰ অনুৰাগীসকলে এক উদ্বিগ্নতাৰে দিন পাৰ কৰিছে।
