আদালত অৱমাননাৰ অভিযোগত অভিযুক্ত জ্যেষ্ঠ অধিবক্তা প্ৰশান্ত ভূষণক আজি উচ্চতম ন্যায়ালয়ে ১ টকাৰ জৰিমনা বিহাৰ লগতে এই জৰিমনা ১৫ ছেপ্তেম্বৰৰ ভিতৰত আদায় নিদিলে তেওঁৰ তিনিমাহৰ জে’লৰ লগতে তিনি বছৰৰ বাবে অধিবক্তাৰ অনুজ্ঞাপত্ৰ বাতিল কৰা হ’ব বুলি ৰায়দান কৰে।
উল্লেখ্য বিগত কিছুদিন ধৰি জ্যেষ্ঠ অধিবক্তা প্ৰশান্ত ভূষণে উচ্চতম ন্যায়ালয় আৰু উচ্চতম ন্যায়ালয়ৰ মুখ্য ন্যায়াধীশৰ বিৰুদ্ধে কেতবোৰ বিশেষ টুইট কৰিছিল।
ইয়াৰ পিছতে ১৪ আগষ্টৰ দিনা উচ্চতম ন্যায়ালয়ে প্ৰশান্ত ভূষণক দোষী সাৱ্যস্ত কৰে আৰু তেওঁক ক্ষমা বিচাৰিবলৈ কয়।
২৪ আগষ্টত প্ৰশান্ত ভূষণে কয় যে তেওঁ যি টুইট কৰিছিল সেয়া সজ্ঞানে কৰিছিল আৰু ইয়াৰ বাবে তেওঁ ক্ষমা নোখোজে।
প্ৰশান্ত ভূষণে এটা টুইটত কৈছিল যে জৰুৰীকালীন অৱস্থা ঘোষণা নোহোৱা সত্বেও দেশত গণতন্ত্ৰ ধ্বংস হৈছে আৰু এই কাৰ্যত উচ্চতম ন্যায়ালয়ৰ ৪ জনকৈ মুখ্য ন্যায়াধীশৰো অৰিহণা আছে।
আন এটা টুইটত প্ৰশান্ত ভূষণে মুখ্য ন্যয়াধীশ এছ এ ববড়েই নাগপুৰৰ ৰাজভৱনত এখন ৫০ লাখ টকীয়া হাৰ্লে ডেভিডছন বাইক চলাই থকাৰ ছবি দিছিল আৰু কৈছিল যে মুখ্য ন্যায়াধীশে চলাই থকা বাইক খন এজন বিজেপি নেতাৰ আৰু তেওঁ কোনো মাস্ক অথবা হেলমেট নিপিন্ধাকৈয়ে বাইক চলাইছে।
প্ৰশান্ত ভূষণৰ এনে টুইটৰ পিছতে তেওঁৰ বিৰুদ্ধে আদালত অৱমাননাৰ অভিযোগ উত্থাপন হৈছিল।
