বন্ধ হ’ব নেকি পেটিএমৰ ইউপিআই? স্পষ্টীকৰণ পেটিএমৰ

পেটিএমৰ ইউপিআই সেৱা বন্ধ হ’ব বুলি ছ’চিয়েল মিডিয়াত চাঞ্চল্য সৃষ্টি হোৱাৰ পাছত উৎকণ্ঠিত হৈ পৰিছে ব্যৱহাৰকৰী । কিন্তু কোম্পানীয়ে স্পষ্ট কৰিছে যে এইটো কেৱল এটা গুজব, অধিসূচনাৰ ভুল বুজাবুজিৰ বাবেই এই বিভ্ৰান্তি সৃষ্টি হৈছে।

২০২৪ চনত ৰিজাৰ্ভ বেংকে Paytm Payments Bank-ৰ ওপৰত কঠোৰ বিধিনিষেধ আৰোপ কৰাৰ পাছত পেটিএমে নিজৰ অপাৰেটিং মডেল সলনি কৰি এতিয়া Third Party Application Provider (TPAP) হিচাপে কাম কৰি আছে। ইয়াৰ বাবে তেওঁলোকে HDFC, Axis, SBI আৰু Yes Bankৰ দৰে বৃহৎ বেংকৰ সৈতে অংশীদাৰিত্ব কৰিছে।

এই গুজব কাৰণ হৈছে গুগল প্লে’ত প্ৰকাশিত এক জাননী। তাত উল্লেখ কৰা হৈছিল যে ভাৰ্চুৱেল পেমেণ্ট ঠিকনা @paytm থকা সকলো পুৰণি ইউপিআই হেণ্ডেল ৩১ আগষ্টৰ পাছত বন্ধ হ’ব। বহুতে ভাবিছিল যে ইয়াৰ অৰ্থ হ’ল পেটিএমৰ ইউপিআই একেবাৰে বন্ধ হব। কিন্তু বাস্তৱত এই পৰিৱৰ্তন কেৱল auto-pay বা চাবস্ক্ৰিপচন সেৱাৰ ক্ষেত্ৰতে প্ৰযোজ্য হ’ব।

যিসকলে এই ধৰণৰ মেণ্ডেট ব্যৱহাৰ কৰে তেওঁলোকে কেৱল নতুন হেণ্ডেল @pthdfc, @ptaxis, @ptyes, @ptsbi — ব্যৱহাৰ কৰিব লাগিব। সাধাৰণ ব্যৱহাৰকাৰীৰ বাবে কোনো বাধা নাই। এককালীন লেনদেন, QR স্কেন বা দোকানত কৰা পেমেণ্ট সকলো আগৰ দৰেই চলি থকিব।

ইতিমধ্যে NPCI-য়ে পেটিএমক অক্টোবৰ মাহৰ পৰা নতুন ব্যৱহাৰকাৰী পঞ্জীয়নৰ অনুমতি প্ৰোদন কোৰিছে। গতিকে ইউপিআই সেৱা বন্ধ হোৱাৰ কোনো ভয় নাই, বৰঞ্চ নতুন বেংকৰ সৈতে অংশীদাৰিত্বৰ বাবে পেটিএমৰ সেৱা অধিক স্থিৰ আৰু বিশ্বাসযোগ্য হৈ উঠিছে।