চীনৰ ইউনান প্ৰদেশৰ দিহং আৰু ৰুইলিৰ মাজত আলফা-স্বাধীনৰ সেনাপ্ৰধান পৰেশ বৰুৱাই বৰ্তমান অৱস্থান কৰিছে, আৰু ম্যানমাৰস্থিত সশস্ত্ৰ সেনানীসকলৰ সৈতে তেওঁ প্ৰত্যক্ষ যোগাযোগ হেৰুৱাই পেলাইছে।
যোৱা তিনি মাহত চাৰ্জেণ্ট বৰুণ অসম, মণিকান্ত সোণোৱাল ওৰফে আদৰ্শ অসম, ভাস্কৰ বৰা ওৰফে থুমুং অসম আৰু নিজান দলে ওৰফে নিঞ্জা অসমকে ধৰি আলফা-স্বাঃৰ বহু সংখ্যক জ্যেষ্ঠ সদস্যই আত্মসমৰ্পণ কৰিছে।
আটাইকেইজন আলফা-স্বাঃ সদস্যই জেৰাকাৰীক জনোৱা মতে অসমলৈ ঘূৰি আহি আত্মসমৰ্পণ কৰাৰ বাহিৰে তেওঁলোকৰ হাতত আন কোনো বিকল্প নাছিল।
এই বছৰৰ ফেব্ৰুৱাৰিৰ পৰা ম্যানমাৰ আৰ্মি তাতমাদাও-এ এন এচ চি এন-খাপলাং-ৰ বিৰুদ্ধে আৰম্ভ কৰা ধাৰাবাহিক অভিযানৰ পিছত ম্যানমাৰত পৰিস্থিতি অতি বিপজ্জনক হৈ পৰিছে, আত্মসমৰ্পণকাৰী সদস্যকেইজনে জনায়।
যুদ্ধবিৰতিৰ গ্ৰাউণ্ড ৰুল ভংগ কৰাৰ অভিযোগত ম্যানমাৰ আৰ্মিয়ে এন এচ চি এন-কেৰ বিৰুদ্ধে বৃ্হৎ সামৰিক অভিযান আৰম্ভ কৰিছিল।
ম্যানমাৰ আৰ্মিয়ে এন এচ চি এন-কেক দোষ দিছে যদিও ভাৰতীয় বিদ্ৰোহীক ম্যানমাৰৰ পৰা নিৰ্মূল কৰিবলৈ নেইপিতাউৰ ওপৰত নতুন দিল্লীৰ হেঁচা থকাটো নিশ্চিত।
তা গাস্থিত আলফা-স্বাঃ, এন দি এফ বি আৰু মেইতেই বিদ্ৰোহীৰ আঠোটা প্ৰশিক্ষণ শিবিৰ ম্যানমাৰ আৰ্মিয়ে সম্পূৰ্ণৰূপে ধ্বংস কৰিছে, আত্মসমৰ্পণকাৰী সদস্যসকলে কয়।
ভুটান আৰু বাংলাদেশত আক্ৰমণৰ সন্মুখীন হোৱাৰ পিছত এন এচ চি এন-কেৰ তদানীন্তন মুৰব্বী এচ এচ খাপলাঙৰ সমৰ্থনত আলফাই প্ৰশিক্ষণ কেন্দ্ৰকেইটা স্থাপন কৰিছিল।
আত্মসমৰ্পণকাৰী আলফা-স্বাঃ সদস্যকেইজনে জনোৱা মতে শিবিৰৰ পৰা তেওঁলোকে পলায়ন কৰিব লগা হৈছিল, আৰু অঞ্চলটোত ম্যানমাৰ ধাৰাসাৰ মৰ্তাৰ আক্ৰমণৰ পৰা নিজকে বচাবলৈ বহু সপ্তাহ ধৰি জংঘলত লুকাই থাকিব লগা হৈছিল।
বাতৰি মতে আলফা-স্বাঃএ মে’জৰ জ্যোতিৰ্ময় অসমকে ধৰি কেইজনমান সেনানীও হেৰুৱাব লগা হৈছে। জংঘলত আত্মগোপন কৰা আন সদস্যসকল ভুগিব লগা হৈছিল তীব্ৰ খাদ্য সংকটত।
ম্যানমাৰৰ জংঘলত আলফা-স্বাঃ সদস্যসকল বিশৃংখল হৈ পৰাৰ ফলত তেওঁলোক সংগঠনটোৰ শীৰ্ষ নেতৃত্ব বিশেষকৈ সেনাপ্ৰধান পৰেশ বৰুৱাৰ সৈতে যোগাযোগ-বিচ্ছিন্ন হৈ পৰিল।
আত্মসমৰ্পণকাৰীসকলে জেৰাকাৰীক জনোৱা মতে ম্যানমাৰ আৰ্মিৰ আক্ৰমণৰ সময়ত পৰেশ বৰুৱা তা গাত নাছিল।
বেছিভাগ সময়তে বৰুৱাই চীনৰ ইউনানৰ দেহং আৰু ৰুইলিৰ দুটা গোপন নিৰাপদ স্থানত বাস কৰে, আত্মসমৰ্পণকাৰী কেইজনে জনায়।
দেহং আৰু ৰুইলি ম্যানমাৰ সীমান্তৰ সমীপৰ, আৰু আত্মসমৰ্পণকাৰী সদস্যকেইজনৰ মতে তা গাৰ প্ৰশিক্ষণ কেন্দ্ৰলৈ আলফা-স্বাঃ সেনাপ্ৰধানজন কাচিন প্ৰদেশৰ ভাম’ হৈ আহে।
আত্মসমৰ্পণকাৰীকেইজনে পৰেশ বৰুৱাৰ স্বাস্থ্য সম্পৰ্কে একো বিশেষ জনাব পৰা নাই। পূৰ্বে একাংশ মিদিয়াত প্ৰকাশ পাইছিল যে বৰুৱাৰ স্বাস্থ্য ভাল নহয়, আৰু তেওঁ চীনত চিকিৎসাধীন হৈ আছে।
ইউনানৰ ৰুইলিৰ দক্ষিণ-পশ্চিম দিশত জাইগাঁৱৰ ফাৰ্স্ত পীপলচ হস্পিটেলত সেনাপ্ৰধানজন চিকিৎসাধীন হৈ থকা বুলি বাতৰি ওলাইছিল।
আত্মসমৰ্পণকাৰী সদস্যকেইজনে জনাই যে তেওঁলোকে জনাত পৰেশ বৰুৱাৰ খুব বেছি দায়েবিটিজ আৰু বৃক্কৰ ৰোগ আছে।
চোৰাংচোৱা সংস্থাসমূহে দাবী কৰে যে দেহং আৰু ৰুইলিৰ উপৰি ইউনানৰে তেনচং আৰু নুইজাঙত পৰেশ বৰুৱাৰ আৰু কেইটামান আত্মগোপনৰ স্থান আছে।
