টীয়কৰ বামুণপুখুৰী চৰাইমুৰীয়া তুলসীজান পথৰ দুৰৱস্থাই জ্বলাকলা খুৱাইছে ৰাইজক
যোৰহাট জিলাৰ টীয়ক সমষ্টিৰ ৪ নং বামুণ পুখুৰী গাঁও পঞ্চায়তৰ অন্তৰ্গত ৩৭ নং ৰাষ্ট্ৰীয় ঘাই পথৰ পৰা চৰাইমৰীয়া-বামুনপুখুৰী তুলসীজান সংযোগী পথটোৰ দুৰৱস্থাই এতিয়া জ্বলাকলা খুৱাইছে অঞ্চলবাসীক।
যোৱা ২০১৯ চনৰ ২২ জানুৱাৰীত টীয়ক সমষ্টিৰ বিধায়িকা ৰেনুপমা ৰাজখোৱাই এই পথটোৰ আধাৰশিলা স্থাপন কৰিছিল।
গড়কাপ্তানী বিভাগৰ যোৰহাট গ্ৰাম্য পথ সংমণ্ডলৰ দ্বাৰা এছ অ পি ডি(জি) আঁচনিৰ অধীনত নিৰ্মাণ কৰিব লগা পথটোৰ আধাৰশিলা স্থাপনতে যেন দায়িত্ব সামৰিলে সকলোৱে।
সংশ্লিষ্ট বিভাগৰ বিষয়া-কৰ্মচাৰীৰ লগতে ঠিকাদাৰৰ অকৰ্মণ্যতাৰ বাবে আজি ১৯-২০ মাহেও পথটো নিৰ্মাণৰ কাম আগ নাবাঢ়িল।
আধাৰশিলা স্থাপনৰ পাছতে কেইগাড়ীমান মাটি আৰু শিলগুটি পেলায়েই দ্বায়িত্ব সামৰিলে ঠিকাদাৰে। যাৰ ফলত আধাৰুৱা হৈ ৰ’ল পথ নিৰ্মাণৰ কাম।
এতিয়া এজাক বৰষুণতে পথটো ঠায়ে ঠায়ে একাঠু দ গাঁত, বোকাময় হৈ গো-বাটলৈ ৰূপান্তৰ ঘটিছে।
যান বাহনৰ চলাচলটো বাদেই, খোজকাঢ়িও যাতায়ত কৰিব নোৱাৰা হৈ পৰিছে পথটো।
সেয়ে আগন্তুক বিধান সভা নিৰ্বাচনৰ পূৰ্বেই পথ নিৰ্মাণৰ কাম সম্পূৰ্ণ নহ’লে বিধায়িকা গৰাকীক ইয়াৰ প্ৰত্যুত্তৰ বেলটৰ যোগেদি দিব বুলি হুংকাৰ দিছে অঞ্চলবাসীয়ে।