এগৰাকী চিকিৎসকলৰ অভাৱত চন্দ্ৰপুৰ ৰাজহ চক্ৰৰ অন্তৰ্গত বৃহত্তৰ পানীখাইতী এলেকাৰ প্ৰায় ২২খন ৰাজহ গাঁৱৰ ৰাইজে এগৰাকী কম্পাউণ্ডাৰৰ পৰা চিকিৎসা সেৱা গ্ৰহণ কৰিবলগীয়া হৈছে। পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰত এগৰাকীও চিকিৎসক নথকা হেতুকে ৰাইজে দীৰ্ঘদিন ধৰি কম্পাউণ্ডাৰৰ পৰাই চিকিৎসা সেৱা গ্ৰহণ কৰি আহিছে।
এই স্বাস্থ্যকেন্দ্ৰটোক একমাত্ৰ চিকিৎসকগৰাকীয়ে যোৱা ৩০ ছেপ্টেম্বৰত অৱসৰ গ্ৰহণ কৰিছে আৰু তাৰ পাছত ইয়াত এগৰাকীও স্থায়ী চিকিৎসক মকৰল কৰা হোৱা নাই।
উল্লেখ্য যে ২০১৭ চনত এই স্বাস্থ্যকেন্দ্ৰটোত ৩গৰাকী চিকিৎসক আছিল। তাৰোপৰি, চিকিৎসকলৰ বাবে নিৰ্মিত আৱাসসমূহো জৰাজীৰ্ণ হৈ পৰিছে।
দিচপুৰ বিধানসভা সমষ্টিৰ অন্তৰ্গত পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰটোৱে গেৰুৱা দলটোৰ বিকাশৰ শ্লোগানৰ আগত এটা বিৰাট প্ৰশ্ন চিহ্ন ঠিয় কৰাইছে।
পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰৰ ওচৰৰ পানবাৰী গাঁৱৰ বাসিন্দা নৃপেন চন্দ্ৰ ডেকাই প্ৰশ্ন কৰে, দিচপুৰ সমষ্টিৰ অন্তৰ্গত সমষ্টিৰে যদি এনে অৱস্থা, তেন্তে ৰাজ্যখনৰ ভিতৰুৱা এলেকাৰ স্বাস্থ্যসেৱা কেনে অৱস্থা হ’ব?
তেওঁ স্বাস্থ্যকেন্দ্ৰটোত এগৰাকী স্থায়ী চিকিৎসক মকৰল কৰাৰ দাবী জনায়।
নাম প্ৰকাশত অনিচ্ছুক ঠাকুৰকুছি গাঁৱৰ এগৰাকী ৬০বছৰীয়া লোকে নৰ্থ ইষ্ট নাওৰ আগত কৈছে, ‘‘চিকিৎসকৰ পদটো খালি হোৱাৰ পৰাই কম্পাউণ্ডাৰ হাছান আলীয়ে চিকিৎসা সেৱা প্ৰদান কৰি আহিছে।
তেতিয়াই আমি পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰলৈ যাওঁ তেতিয়া আমি সঠিক চিকিৎসা লাভ নকৰোঁ। যদিওবা কম্পাউণ্ডাৰগৰাকীয়ে নিদান দিয়ে আমাৰ শংকা দূৰ নহয়।’’
তাৰোপৰি, আছুৰ চন্দ্ৰপুৰ আঞ্চলিক গোটৰ সাধাৰণ সম্পাদক মৃদুল কুমাৰ দাসে চৰকাৰ আৰু সংশ্লিষ্ট কৰ্তৃপক্ষৰ ওচৰত এগৰাকী স্থায়ী চিকিৎসক অনতিপলমে মকৰল কৰাৰ দাবী জনায়।
উল্লেখ্য যে যোৱা ২২ অক্টোবৰত ৰাইজৰ হেঁচাত প্ৰায় ৪ কি:মি: নিলগৰ হাতীবগৰা ক্ষুদ্ৰ প্ৰাথমিক স্বাস্থ্যকেন্দ্ৰৰ চিকিৎসা বিষয়া মুনটী ভট্ৰাচাৰ্যক পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰটোৰ অস্থায়ী দায়িত্ব প্ৰদান কৰা হৈছে।
আনহাতে, ১৯৮৯ৰ পৰা ক্ষুদ্ৰ প্ৰাথমিক স্বাস্থ্যকেন্দ্ৰটোত কৰ্মৰত চকীদাৰগৰাকীয়ে কৈছে চিকিৎসকগৰাকীয়ে সপ্তাহৰ ২ বা ৩ দিনহে উপস্থিত থাকে। যিটো স্বাস্থ্য প্ৰশিক্ষক বিকে গোস্বামীৰ ভাষ্যৰ সম্পূৰ্ণ বিপৰীত।
এই ক্ষেত্ৰত স্বাস্থ্য বিষয়া মুনটী ভট্টাচাৰ্য, স্বাস্থ্য প্ৰশিক্ষক বিকে গোস্বামী, কম্পাউণ্ডাৰ হাছান আলীয়ে কেমেৰাৰ আগত কোনো মন্তব্য দিয়াৰ পৰা বিৰত থাকে।
নৰ্থ ইষ্ট নাওৰ সৈতে হৱা বাৰ্তালাপত এগৰাকী স্থানীয় বাসিন্দা মদন কলিতাই কয়, ‘‘এই সমস্যৰ সমাধান এগৰাকী অস্থায়ী চিকিৎসক নহয়, যিহেতু এই অঞ্চলৰ ৰাইজ গুৱাহাটী চিকিৎসা মহাবিদ্যালয় আৰু মহেন্দ্ৰ মোহন চৌধুৰী হস্পিটেললৈ দৌৰি যোৱাটো সম্ভৱ নহয়।
পানীখাইটী ক্ষুদ্ৰ প্ৰাথমিক স্বাস্থ্যকেন্দ্ৰটো অসম গণ পৰিষদ চৰকাৰৰ তদানিন্তন গড়কাপ্তানি মন্ত্ৰী অতুল বৰাই ১৯৮৯ চনৰ ২৭ মাৰ্চত উদ্বোধন কৰিছিল।
