‘কংগ্ৰেছৰ দুৰ্গ উৎখাত হৈছে। গহপুৰত ৰিপুন বৰা ধুলিসাৎ হৈ গৈছে।‘ অসম প্ৰদেশ কংগ্ৰেছ কমিটিৰ সভাপতি ৰিপুন বৰাক এইদৰে আজি কটাক্ষ কৰে ৰাজ্যিক বিজেপিৰ সাধাৰণ সম্পাদক দিলীপ শইকীয়াই।
আজি পঞ্চায়ত নিৰ্বাচনৰ ভোট গণনা চলি থকাৰ সময়তে ৰাজ্যিক বিজেপিৰ সাধাৰণ সম্পাদক গৰাকীয়ে সংবাদ মাধ্যৰ আগত মন্তব্য কৰি কয় যে, ‘জনসাধাৰণে কংগ্ৰেছ দলক নস্যাৎ কৰিছে।’ লগতে শইকীয়াই চাহ বাগিচা অঞ্চলসমূহত, সংখ্যালঘু অধ্যুষিত অঞ্চলসমূহত বিজেপিয়ে ব্যাপক সমৰ্থন লাভ কৰিবলৈ সক্ষম হৈছে বুলিএ কয়।
আনহাতে সাধাৰণ সম্পাদক গৰাকীয়ে অগপ দলকো সমালোচনা কৰি, ‘অসমৰ জনসাধাৰণে অগপক নস্যাৎ কৰিছে’ বুলি কয়।
লগতে তেওঁ কয় যে প্ৰফুল্ল কুমাৰ মহন্ত, কেশৱ মহন্ত, বৃন্দাবন গোস্বামী, সত্যব্ৰত কলিতা, পবিন্দ্ৰ ডেকা আৰু ৰমেন্দ্ৰ নাৰায়ণ কলিতাৰ সমষ্টিত ভাৰতীয় জনতা পাৰ্টীয়ে আশা কৰাতকৈয়ো অধিক ভাল ফলা-ফল পাবলৈ সক্ষম হৈছে।
‘শক্তিশালী বিজেপি সমৃদ্ধিশালী অসম’ এই মন্ত্ৰৰে বিজেপি পঞ্চায়ত নিৰ্বাচনত অৱতীৰ্ণ হৈছিল বুলি সংবাদ মাধ্যমৰ আগত শইকীয়াই মন্তব্য কৰে।
তাৰোপৰি ‘বিকশিত গ্ৰাম্যাঞ্চল, দুৰ্নীতি মুক্ত পঞ্চায়ত’ শ্ল’গান গাঁৱৰ ৰাইজে আঁকোৱালি লৈছে বুলি মন্তব্য কৰি শইকীয়াই পঞ্চায়ত নিৰ্বাচনৰ নিৰ্বাচনী ফলাফলৰ বৰ্তমানৰ প্ৰাৰম্ভিক স্থিতি শেষৰ পৰ্য্যায়লৈকে বৰ্তি থাকিব বুলি উল্লেখ কৰে।
আনহাতে উন্নয়নৰ ৰাজনীতিৰেই পঞ্চায়ত পৰ্য্যায়ৰ পৰা লোকসভা নিৰ্বাচনলৈকে বিজেপিয়ে সফলতা লাভ কৰিব বুলি শইকীয়াই দাবী কৰে।
উল্লেখযোগ্য যে পঞ্চায়ত নিৰ্বাচনত ২৭০০০ ভাৰতীয় জনতা প্ৰাৰ্থীৰ ভিতৰত ২০০০০ হাজাৰেই জয় লাভ কৰি বিজেপি প্ৰথমস্থানত থাকিব বুলি ৰাজ্যিক বিজেপিৰ সাধাৰণ সম্পাদক গৰাকীয়ে দাবী কৰে।
ইফালে কালি ঘোষিত ৫ ৰাজ্যৰ ফলাফলে লোকসভা নিৰ্বাচনত বিজেপি দলক প্ৰভাৱ নেপেলায় বুলিও সাধাৰণ সম্পাদক গাৰকীয়ে আজি সংবাদমাধ্যমৰ আগত মন্তব্য কৰে।
