একেৰাহে বৃদ্ধি পাই থকা পেট্ৰ’ল-ডিজেলৰ দৰে সাধাৰণ জনতাৰ ওপৰত মাধমাৰ শোধাবলৈ উদ্যত হৈছে। পেট্ৰ’ল-ডিজেলৰ দৰ বৃদ্ধিৰ এই গতি ১৬দিনৰ দিনাও অব্যাহত আছে।
আজি পুনৰ তেল কোম্পানীসমূহে দৰ বৃদ্ধিৰ কথা ঘোষণা কৰিছে।
পেট্ৰ’লৰ দৰ ০.৩৩টকা বৃদ্ধি পোৱাৰ বিপৰীতে ডিজেলৰ দৰ ০.৫৮টকা বৃদ্ধি পাইছে।
সোমবাৰে ৰাজধানী দিল্লীত পেট্ৰ’লৰ দৰ বৃদ্ধি পাই প্ৰতি লিটাৰত ৭৯.৫৬টকা হৈছেগৈ।
সেইদৰে ডিজেলৰ দৰ প্ৰতি লিটাৰত ৭৮.৮৫টকালৈ বৃদ্ধি পাইছে।
বাতৰি অনুসৰি, যোৱা ১৫দিনৰ পৰা খাৰুৱা তেলৰ দৰ প্ৰতি বেৰলত ৩৫-৪০ ডলাৰৰ মাজত ৰৈছে। কিন্তু ভাৰতত পেট্ৰ’ল-ডিজেলৰ দৰ অপ্ৰতিৰোধ্য গতিত বৃদ্ধি পোৱা দেখা গৈছে।
উল্লেখ্য যে প্ৰতিদিনে পুৱা ৬বজাত পেট্ৰ’ল-ডিজেলৰ দৰ সলনি হৈ আহিছে। সেইদৰে পুৱা ৬বজাৰ পৰা নতুন দৰ প্ৰযোজ্য হৈছে।
প্ৰতিদিনৰ পেট্ৰ’ল-ডিজেলৰ দৰ আপুনি এছ এম এছৰ জৰিয়তেও জানিব পাৰে। ইয়াৰ বাবে ইণ্ডিয়ান অইলৰ গ্ৰাহকে RSP লিখি ৯২২৪৯৯২২৪৯ নম্বৰত প্ৰেৰণ কৰিলেও দৈনিক দৰৰ সৱিশেষ জানিব পাৰিব।
