গেৰুৱা বসন পিন্ধাৰ পূৰ্বে বিধায়ক পদ ত্যাগ কৰিলে ভৱানীপুৰৰ ফনীধৰ তালুকদাৰে
পৰিকল্পনা মতেই এইবাৰ বিধায়ক পদ ত্যাগ কৰিলে ভৱানীপুৰৰ ফনীধৰ তালুকদাৰে।
আজি বিধানসভাৰ অধ্যক্ষৰ হাতত দাখিল কৰিলে পদত্যাগ পত্ৰ।
ভৱানীপুৰ সমষ্টিৰ এ আই য়ু ডি এফ দলৰ বিধায়ক আছিল ফনীধৰ তালুকদাৰ।
মঙলবাৰে তেওঁ এ আই য়ু ডি এফ দল ত্যাগ কৰিছিল।
ইপিনে, আজি পুৱাই তেওঁ মুখ্যমন্ত্ৰী ড০ হিমন্ত বিশ্ব শৰ্মাক সাক্ষাৎ কৰিছে।
মুখ্যমন্ত্ৰীক সাক্ষাৎ কৰি তেওঁক সম্বৰ্ধনা জ্ঞাপন কৰে ফনীধৰ তালুকদাৰে।
মুখ্যমন্ত্ৰী ড০ হিমন্ত বিশ্ব শৰ্মাই ছ’চিয়েল মিডিয়াযোগে এই কথা সদৰী কৰিছে।
ইতিমধ্যে ফনীধৰ তালুকদাৰৰ বিজেপি গমন নিশ্চিত হৈছে। দুই এদিনতে গেৰুৱা সাজ পিন্ধিব সদ্য প্ৰাক্তন বিধায়ক তালুকদাৰে।
ফনীধৰ তালুকদাৰৰ দলত্যাগ তথা বিধায়ক পদ ত্যাগৰ লগে লগে ভৱানীপুৰ সমষ্টিতো উপনিৰ্বাচন হোৱাতো নিশ্চিত হৈছে।
অৰ্থাৎ অসমত এতিয়াৰ হিচাপত ৬ টা সমষ্টিত উপনিৰ্বাচন অনুষ্ঠিত হ’ব।
গোসাইগাঁও, তামুলপুৰ, মৰিয়নী, থাওৰা, মাজুলীৰ পাছত ভৱানীপুৰতো এইবাৰ উপনিৰ্বাচন অনুষ্ঠিত হোৱাতো নিশ্চিত হৈ পৰিল।