দক্ষিণ এছিয়া বিশ্ববিদ্যালয়ৰ এগৰাকী পি এইচ ডিৰ ছাত্ৰই কাশ্মীৰৰ ওপৰত গৱেষণাৰ বাবে এই কাৰ্যসূচীৰ পৰা আঁতৰি আহিল। আনহাতে, তত্বাৱধায়ক অধ্যাপকগৰাকীয়েও পদত্যাগ কৰিছে।
দক্ষিণ এছিয়া বিশ্ববিদ্যালয়ৰ (ছাউথ এছিয়ান ইউনিভাৰ্ছিটি)এগৰাকী পি এইচ ডিৰ ছাত্ৰই কাশ্মীৰৰ নৃতত্ত্ব আৰু ৰাজনৈতিক বিষয়সমূহৰ ওপৰত তেওঁৰ গৱেষণামূলক প্ৰস্তাৱৰ বাবে কাৰণ দৰ্শোৱাৰ জাননী লাভ কৰি ‘ব্যক্তিগত’ কাৰণত ডক্টৰেট ডিগ্ৰীৰ কাৰ্যসূচীৰ পৰা আঁতৰি আহিছে।
একে সময়তে ছাত্ৰগৰাকীৰ তত্বাৱধায়ক অধ্যাপক শশাংক পেৰেৰাৰ বিৰুদ্ধেও অনুশাসনমূলক তদন্ত আৰম্ভ হৈছিল, যাৰ ফলত তেওঁ পদত্যাগ কৰে।
১৩ বছৰ ধৰি SAU ত অধ্যাপনা কৰা আৰু কেম্পাছৰ একমাত্ৰ শ্ৰীলংকাৰ অধ্যাপক বিশিষ্ট নৃতত্ত্ববিদ শশাংকা পেৰেৰাই ২০২৪ চনৰ জুলাই মাহত পদত্যাগ কৰে। তেওঁ কয় যে তেওঁ অনুশাসনমূলক তদন্তত ন্যায়ৰ কোনো আশা দেখা নাই আৰু ইয়াক “মিছা আৰু ভিত্তিহীন অভিযোগ”ৰ ওপৰত ভিত্তি কৰি কৰা হৈছে।
পি এইচ ডি ছাত্ৰগৰাকীৰ গৱেষণা প্ৰস্তাৱত আমেৰিকাৰ ভাষাবিদ নোয়াম চমস্কিৰ সমালোচনাৰ কিছু উল্লেখ আছিল, য’ত চমস্কিয়ে নেশ্যনেল ডেম’ক্ৰেটিক এলায়েন্স (এন ডি এ) চৰকাৰক কঠোৰ সমালোচনা কৰিছিল। ব্যক্তিগত ইউটিউব ভিডিঅ’ত চমস্কিয়ে প্ৰধানমন্ত্ৰী নৰেন্দ্ৰ মোডীক ভাৰতৰ ধৰ্মনিৰপেক্ষ গণতন্ত্ৰ ভাঙি হিন্দু জাতীয়তাবাদ জাপি দিয়াৰ অভিযোগ উত্থাপন কৰিছিল।
পেৰেৰাৰ পদত্যাগৰ পিছত ছাত্ৰগৰাকীয়ে অনুশাসন সমিতিৰ সন্মুখত হাজিৰ হৈ “ভাৱাবেগত আঘাত” কৰাৰ বাবে ক্ষমা বিচাৰিছিল। সেই গৱেষণাৰ বাবে কাৰ ভাৱাবেগত আঘাত পাইছিল তাৰ কোনো প্ৰতিক্ৰিয়া পোৱা নগ’ল।
কিন্তু ডিচেম্বৰ মাহত যেতিয়া বিশ্ববিদ্যালয়ৰ প্ৰোক্টৰৰ কাৰ্যালয়ে ছাত্ৰগৰাকীক তেওঁৰ অনুপস্থিতিৰ সন্দৰ্ভত প্ৰোক্টৰৰ কমিটিৰ সন্মুখত হাজিৰ হ’বলৈ কয়, তেতিয়া ছাত্ৰগৰাকীয়ে পি এইচ ডি কাৰ্যসূচীৰ পৰা আঁতৰি আহি নিজৰ ব্যৱসায়ত মনোনিৱেশ কৰা বুলি উল্লেখ কৰে।
উল্লেখ্য যে SAU হৈছে আঠখন SARC ৰাষ্ট্ৰৰ সহযোগত প্ৰতিষ্ঠিত এক আন্তঃৰাষ্ট্ৰীয় প্ৰতিষ্ঠান আৰু ভাৰতৰ বৈদেশিক পৰিক্ৰমা মন্ত্ৰালয়ৰ অধীনত পৰিচালিত।
