প্ৰধানমন্ত্ৰী নৰেন্দ্ৰ মোদীৰ মাহেকীয়া ৰেডিঅ’ অনুষ্ঠান ‘মন কি বাত’এ উপাৰ্জন কৰিছে ৩৪.১৩ কোটি টকা। শুকুৰবাৰে ৰাজ্যসভাত লিখিত প্ৰশ্নৰ উত্তৰত এই তথ্য প্ৰদান কৰে মোদী চৰকাৰে। তথ্য আৰু সম্প্ৰচাৰ ৰাজ্যিক মন্ত্ৰী এল মুৰুগানে কয় যে এই কাৰ্যসূচী বিভিন্ন মাধ্যমত সম্প্ৰচাৰ কৰা হয়।
অল ইণ্ডিয়া ৰেডিঅ’ৰ দ্বাৰা প্ৰস্তুত কৰা এই অনুষ্ঠানৰ সম্প্ৰচাৰৰ বাবে কোনো অতিৰিক্ত ধন ব্যয় হোৱা নাছিল বুলিও তেওঁ জানিবলৈ দিয়ে। বৰঞ্চ ইয়াৰ পৰাই উপাৰ্জন কৰিছিল ৩৪.১৩ কোটি টকা। মন কৰিবলগীয়া যে এই অনুষ্ঠানটো প্ৰথমবাৰৰ বাবে ২০১৪ চনৰ ৩ অক্টোবৰত সম্প্ৰচাৰ কৰা হৈছিল।
মুৰুগানে আজি কয় যে দেশৰ জনসাধাৰণৰ এক বৃহৎ অংশই প্ৰতি মাহৰ শেষৰ দেওবাৰে অল ৰেডিঅ’ ইণ্ডিয়াই সম্প্ৰচাৰিত ‘মন কি বাত’ শুনি থাকে। ইয়াৰ উপৰিও দূৰদৰ্শনৰ ৰাষ্ট্ৰীয় আৰু বিভিন্ন আঞ্চলিক চেনেলতো সম্প্ৰচাৰ কৰা হয়। লগতে তেওঁ কয় যে ডি ডি ফ্ৰী ডিচৰ অফাৰ অনুসৰি ইয়াক ৪৮টা অল ইণ্ডিয়া ৰেডিঅ’ চেনেল আৰু ৯২টা টিভি চেনেলত সম্প্ৰচাৰ কৰা হয়। ইয়াৰ উপৰিও পিএমঅ’ ইণ্ডিয়াৰ ইউটিউব চেনেল আৰু প্ৰসাৰ ভাৰতীৰ অ’টিটি প্লেটফৰ্ম ৱেভছত শুনা যায়। ইয়াৰ উপৰিও ‘NewsOnAir’ নামৰ মোবাইল এপটোত শুনা যায়।
প্ৰসংগক্ৰমে যোৱা মাহৰ শেষৰ দেওবাৰটো আছিল ‘মন কি বাত’ অনুষ্ঠানৰ শেহতীয়া খণ্ড। তাতে প্ৰধানমন্ত্ৰীয়ে বংগৰ অগ্নি যুগৰ এজন বিপ্লৱীক স্মৰণ কৰে ভাষণত তেওঁ স্বাধীনতা আন্দোলনৰ আগষ্ট মাহৰ গুৰুত্বপূৰ্ণ ঘটনাসমূহৰ ওপৰত আলোকপাত কৰে। সেই সময়ত মোদীয়ে খুদিৰাম বসুক দেশপ্ৰেমৰ অন্যতম উজ্জ্বল নিদৰ্শন হিচাপে উল্লেখ কৰিছিল।
