গোৱালপাৰাত সক্ৰিয় গাড়ী চোৰৰ চক্ৰ; নিশা গাড়ী চালকৰ গৃহৰ পৰা চুৰি পিকআপ ভ্যান

গোৱালপাৰা জিলাৰ কৃষ্ণাই আৰক্ষী চকীৰ অন্তৰ্গত বিভিন্ন অঞ্চলত শেহতীয়াকৈ গাড়ী চোৰৰ চক্ৰ সক্ৰিয় হৈ উঠাৰ পৰিলক্ষিত হৈছে৷

৭ ফেব্ৰুৱাৰি নিশা কৃষ্ণাইৰ কাষৰীয়া হাব্ৰাঘাটৰ এজন গাড়ী চালক ঘৰৰ পৰা  এখন পিকআপ ভ্যান চুৰি হোৱা ঘটনাই অঞ্চলটোত প্ৰতিক্ৰিয়াৰ সৃষ্টি কৰিছে৷

জানিব পৰা মতে, কৃষ্ণাই মোলানডুবীৰ জাহানুৰ ইছলামৰ এ এছ-১৮ এচি ০১৩৯ নম্বৰৰ গাড়ীখন ভাৰামাৰি নিশা ড্ৰাইভাৰ ৰাজ আহমেদে নিজৰ ঘৰলৈ লৈ গৈছিল যদিও নিশা গাড়ী চোৰে গাড়ীখন লৈ উধাও হয়৷

ইফালে, ৰাতিপুৱা ঘৰত গাড়ীখন দেখা নাপাই চালক ৰাজ আহমেদে গাড়ীৰ মালিকক কথাটো অৱগত কৰে৷

ঘটনাৰ সন্দৰ্ভত চুৰি হোৱা গাড়ীখনৰ গৰাকীয়ে কৃষ্ণাই আৰক্ষী থানাত এখন এজাৰ দাখিল কৰিছে যদিও এতিয়ালৈকে গাড়ীখনৰ কোনোধৰণৰ শুংসূত্ৰ পোৱা নায়৷

উল্লেখযোগ্য যে, বিগত কিছুদিনৰ পৰা অঞ্চলটোৰ বিভিন্ন স্থানত সঘনে বাইক আৰু চাৰিচকীয়া গাড়ী চুৰিৰ ঘটনা সংঘটিত হৈ আহিছে৷

স্থানীয় আৰক্ষীয়ে গাড়ী চোৰৰ চক্ৰটোক কৰায়ত্ত তথা সম্পূৰ্ণৰূপে উৎখাত কৰাত ব্যৰ্থ হৈছে বুলি স্থানীয় ৰাইজে মন্তব্য কৰে।