ক’ৰ’না ভাইৰাছৰ প্ৰতিৰোধৰ বাবে এইবাৰ সহায় কৰিবলৈ আগবাঢ়ি আহিছে প্ৰসিদ্ধ পাইলট বাবা। এই মহামাৰী ভাইৰাবিধৰ বিৰুদ্ধে যুঁজিবলৈ পাইলট বাবা সংস্থানে কেন্দ্ৰীয় চৰকাৰলৈ আগবঢ়াইছে ১ কোটি ৪২ লাখ টকা।
পাইলট বাবা সংস্থানে মুখ্য মন্ত্ৰী ট্ৰিবেন্দ্ৰ সিং ৰাৱটৰ জৰিয়তে পি এম কেয়াৰ্ছ ফাণ্ডলৈ এই আৰ্থিক সাহায্য প্ৰদান কৰিছে।
পাইলট বাবাৰ হৈ তেওঁৰ শিষ্য সুনীল ছেনীয়ে মুখ্য মন্ত্ৰী ৰাৱটক অনলাইন ট্ৰেন্সফাৰৰ কপিটো প্ৰদান কৰে।
দেশৰ এই সংকটৰ সময়ত পাইলট বাবাই বিশ্ব শান্তি আৰু কল্যাণৰ কামনা কৰে। বাবাই কয়, ‘ভাৰতবৰ্ষ দেৱীৰ ভূমি, ইয়াৰ লোকৰ ধনাত্মক শক্তি আছে। ভাগ্যৰ ফলত ভাৰতে প্ৰধান মন্ত্ৰী মোদীৰ ৰূপত দক্ষ নেতৃত্ব লাভ কৰিছে’।
বাবাই লগতে আশা কৰিছে যে ভাৰতে অতি শীঘ্ৰে মহামাৰী ক’ৰ’নাৰ বিৰুদ্ধে বিজয়ী হ’ব। তদুপৰি উত্তৰাখণ্ড চৰকাৰৰো শলাগ লৈছে বাব পাইলটে।
তেওঁ কয়, ‘মুখ্য মন্ত্ৰী ট্ৰিবেন্দ্ৰ সিং ৰাৱট নিকা ভাৱমূৰ্তিৰ ব্যক্তি। ক’ৰ’না প্ৰতিৰোধৰ বাবে তেওঁ সঠিক সময়ত সঠিক সিদ্ধান্ত লৈছে। মই নিশ্চিত যে উত্তৰাখণ্ডৰ লগতে সমগ্ৰ ভাৰত ক’ৰ’নাৰ পৰা অতি শীঘ্ৰে মুক্তি লাভ কৰিব’।
ইয়াৰ উপৰি পাইলট বাবাই সকলো লোককে সামাজিক দূৰত্ব বজাই ৰখাৰ লগতে বিনা কাৰণত ঘৰৰ পৰা বাহিৰলৈ ওলাই নাহিবলৈ অনুৰোধ জনাইছে।
