অসমৰ পৰা ভূটানলৈ যোৱা বিদেশী পৰ্যটকৰ শৰীৰত কৰ’না ভাইৰাছৰ উপস্থিতি ধৰা পৰাৰ পাছত কৰ’না ভাইৰাছ সম্পৰ্কে এখন সংবাদমেল অনুষ্ঠিত কৰে ৰাজ্যিক স্বাস্থ্য মন্ত্ৰী পীযুষ হাজৰিকাই।
ৰাষ্ট্ৰীয় স্বাস্থ্য অভিযান, অসমৰ কাৰ্য্যালয়ত অনুষ্ঠিত হোৱা এই সংবাদমেলত হাজৰিকাই অসমৰ জনসাধাৰণক চিন্তিত নহবলৈ আহ্বান জনাই ৰাজ্যত কৰ’না ভাইৰাছৰ ফলত এজন ৰোগীৰ যাতে মৃত্যু নহয় তাৰ বাবে ব্যৱস্থা গ্ৰহণৰ আশ্বাস দিয়ে।
সংবাদ মেলত হাজৰিকাৰ লগত উপস্থিত থকা স্বাস্থ্য বিষয়া দুগৰাকীয়ে সাংবাদিকৰ প্ৰশ্নৰ উত্তৰ দি বৰ্তমানলৈ বিশ্বত প্ৰায় ১ লাখ লোক কৰ’না ভাইৰাছৰদ্বাৰা আক্ৰান্ত হৈছে যদিও এতিয়ালৈ ভাৰতত ইশ্বৰৰ কৃপাত এজনো লোকৰ মৃত্যু হোৱা নাই বুলি কয়।
আনহাতে, অসমত বৰ্তমানলৈ এজনো কৰ’না ভাইৰাছৰ দ্বাৰা আক্ৰান্ত ৰোগী চিনাক্ত হোৱা নাই বুলিও সংবাদ মেলত উল্লেখ কৰা হয়।
তদুপৰি, কৰ’না ভাইৰাছ প্ৰতিৰোধৰ বাবে সাধাৰণ পৰিস্কাৰ-পৰিচন্নতা বজাই ৰখাৰ লগতে এন৯৫ মাস্ক নহলেও সাধাৰণ মাস্ক পিন্ধিলেও হ’ব বুলি সংবাদমেলত কোৱা হয়।
ইপিনে, অসমৰ পৰা হৈ ভূটনাত কৰ’না ভাইৰাছৰ উপস্থিতি ধৰা পৰা মাৰ্কিন পৰ্যটক গৰাকীয়ে থকা সকলো হোটেলৰ কৰ্মীসকলক নিৰীক্ষণত ৰখা হৈছে আৰু তেওঁলোকৰ স্বাস্থ্য পৰীক্ষা কৰি থকা হৈছে বুলিও সংবাদমেলৰ জৰিয়তে জানিবলৈ দিয়া হয়।
ৰাজ্যৰ বিমান বন্দৰত এতিয়ালৈ মুঠ ৫৮৫ গৰাকী লোকক পৰীক্ষা কৰা হৈছে বুলি সদৰি কৰি পীযুষ হাজৰিকাই জিএমচিএইচত পৰীক্ষাসমূহ কৰি থকা হৈছে আৰু কাইলৈৰ পৰা ডিব্ৰুগড় চিকিৎসা মহাবিদ্যালয়তো পৰীক্ষা আৰম্ভ কৰা হ’ব বুলি মত প্ৰকাশ কৰে।
চৰকাৰী চিকিৎসালয়ৰ লগতে সকলো ব্যক্তিগত চিকিৎসালয়ৰ লগতে চৰকাৰে যোগাযোগ ৰক্ষা কৰি আছে বুলিও সংবাদমেলত উল্লেখ কৰা হয়।
