‘শিক্ষিত হলেই চৰিত্ৰৱান নহয়। চাৰিত্ৰিক শিক্ষা গ্ৰহণেহে চৰিত্ৰ গঠন কৰে। আধ্যাত্মিক আৰু নৈতিক জ্ঞানেৰে সমৃদ্ধ শিক্ষাৰ্থীসকলে সমাজৰ বিভীষিকাময় পৰিৱেশৰ অৱসান ঘটাব পাৰিব।’ এই মন্তব্য ড০ পীতাম্বৰ দেৱ গোস্বামীৰ।
বুধবাৰে শিৱসাগৰ জিলাৰ আমগুৰিৰ আগশাৰীৰ শিক্ষানুষ্ঠান আউনীআটীয় হেমচন্দ্ৰ দেৱ উচ্চতৰ মাধ্যমিক বিদ্যালয়ৰ বৰ্ষজোৰা মহাৰজত জয়ন্তীৰ আৰম্ভনি সমাৰোহৰ শুভাৰম্ভ কৰি দিয়া ভাষণত আউনীআটী সত্ৰৰ সত্ৰাধিকাৰ গৰাকীয়ে এনেদৰে কয়।
মহাৰজত জয়ন্তী উপলক্ষে বিদ্যালয়খনৰ অধ্যক্ষ অমৰজ্যোতি বৰঠাকুৰ আৰু উদযাপন সমিতিৰ কাৰ্যকৰী সভাপতি ড০ অনিল কুমাৰ গগৈয়ে শিক্ষানুষ্ঠানখনৰ পতাকা আৰু মহাৰজত জয়ন্তীৰ পতাকা উত্তোলন কৰাৰ পিছতে পীতাম্বৰ দেৱ গোস্বামীয়ে বিদ্যালয় প্ৰাঙ্গনত স্থাপন কৰিব লগীয়া হেমচন্দ্ৰ দেৱ গোস্বামীৰ আবক্ষমূৰ্তিৰ আধাৰশিলা স্থাপন কৰে।
আনহাতে অনুষ্ঠানত প্ৰশাসনিক ভৱন, পুথিভঁৰাল, খেলপথাৰ উন্নয়ন আৰু খোৱা পানী যোগান প্ৰকল্পৰ আধাৰশিলা স্থাপন কৰে ক্ৰমে শোণিত লাহন, ড০ মিনতি চুতীয়া, বিনন্দ বড়া আৰু যোগেশ কিশোৰ ফুকনে।
মহাৰজত জয়ন্তীৰ লগত সংগতি ৰাখি এখনি গ্ৰন্থমেলা আৰু প্ৰদৰ্শণীৰো দ্বাৰা মুকলি কৰা হয়। জয়ন্তী উপলক্ষে আমগুৰি নগৰৰ মাজেদি বাহিৰ কৰা সুদীৰ্ঘ সাংস্কৃতিক শোভাযাত্ৰাই সকলোৰে দৃষ্টি আকৰ্ষণ কৰে।
আনহাতে শিক্ষানুষ্ঠানখনৰ প্ৰাক্তন ছাত্ৰ চিকিৎসক ডাঃ অভেদ্য বুঢ়াগোহাঁইয়ে উদ্বোধন কৰা প্ৰাক্তন ছাত্ৰ-ছাত্ৰী সমাৰোহত বিশিষ্ট অতিথিৰূপে উপস্থিত থাকে বিদ্যালয়ৰ প্ৰাক্তন ছাত্ৰ তথা মনোৰোগ চিকিৎসক ডাঃ পংকজ লোচন শইকীয়া। আজি বিয়লি অনুষ্ঠিত হ’ব লগা মুকলি সভাত মুখ্য মন্ত্ৰীৰ প্ৰেছ উপদেষ্টা হৃষীকেশ গোস্বামী উপস্থিত থকাৰ কথা।
