শ্বেখ হাছিনা চৰকাৰৰ পতনৰ পিছত প্ৰথমবাৰৰ বাবে বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে ভাৰতৰ প্ৰধানমন্ত্ৰী নৰেন্দ্ৰ মোডীৰ সৈতে সাক্ষাৎ কৰে।
বিমষ্টেক সন্মিলনত অংশগ্ৰহণৰ বাবে সম্প্ৰতি বেংককত আছে দুয়োখন দেশৰ ৰাষ্ট্ৰৰ মুৰব্বী। সন্মিলনত দুয়োজনে একেলগে ৰাতিৰ আহাৰ গ্ৰহণ কৰাও দেখা গৈছিল। শুকুৰবাৰে পুৱা দুয়োৰে মাজত বৈঠক হোৱা দেখা গৈছে। মোডী আৰু ইউনুছে হাঁহিমুখে হাত মিলাই থকা দেখা গৈছে।
উল্লেখ্য যে শেহতীয়াকৈ সংখ্যালঘুৰ ওপৰত অত্যাচাৰৰ বিষয়টোক লৈ বাংলাদেশ আৰু ভাৰতৰ মাজৰ সম্পৰ্কৰ অৱনতি ঘটিছে। সেই পৰিস্থিতিত মোডী আৰু ইউনুছৰ বৈঠকক তাৎপৰ্যপূৰ্ণ বুলি গণ্য কৰিছে আন্তঃৰাষ্ট্ৰীয় মহলে।
বৃহস্পতিবাৰে থাইলেণ্ডত অনুষ্ঠিত বিমষ্টেক সন্মিলনত ভাষণ প্ৰদান কৰি ভাৰতৰ বৈদেশিক পৰিক্ৰমা মন্ত্ৰী এছ জয়শংকৰে মহম্মদ ইউনুছক সুচতুৰতাৰে বংগোপসাগৰৰ ভূগোল বুজাই দিয়ে। তেওঁ ইউনুছৰ “এই অঞ্চলৰ একমাত্ৰ সাগৰৰ অভিভাৱক বাংলাদেশ” মন্তব্যৰ উপযুক্ত প্ৰত্যুত্তৰ দিছিল।
২০২৪ চনৰ আগষ্ট মাহত বাংলাদেশৰ প্ৰধানমন্ত্ৰী শ্বেখ হাছিনাক ক্ষমতাৰ পৰা উৎখাত কৰা হয়। ইয়াৰ পিছত ইউনুছৰ নেতৃত্বত এখন অন্তৱৰ্তীকালীন চৰকাৰ ক্ষমতালৈ আহে। সেই সময়ৰ পৰাই শ্বেখ হাছিনা ভাৰতত আছে।
বাংলাদেশ আৰু ভাৰতৰ মাজত দ্বিপাক্ষিক সম্পৰ্ক ক্ৰমান্বয়ে অৱনতি ঘটিছে। সংখ্যালঘু হিন্দুৰ বিৰুদ্ধে অবাধ হিংসা আৰু বাংলাদেশত ইছলামিক মৌলবাদী শক্তিৰ উত্থানক লৈ নতুন দিল্লীয়ে উদ্বেগ প্ৰকাশ কৰিছে। আনহাতে বাংলাদেশেও হাছিনা ভাৰতত থকাক লৈ আপত্তি কৰিছে।
ইউনুছৰ চীন ভ্ৰমণৰ পিছত যোৱা সপ্তাহত দুয়োখন দেশৰ মাজত উত্তেজনা বৃদ্ধি পাইছে। চীন ভ্ৰমণৰ সময়ত ইউনুছে বেইজিঙক বাংলাদেশত বিনিয়োগ কৰিবলৈ আহ্বান জনায়। সেই সময়ত তেওঁ বিতৰ্কিত মন্তব্য কৰিছিল যে ভাৰতৰ উত্তৰ-পূবৰ সাতখন ৰাজ্য স্থলভাগেৰে আবদ্ধ। সাগৰত উপস্থিত হ’বলৈ তেওঁলোক বাংলাদেশৰ ওপৰত নিৰ্ভৰশীল।
