নিৰ্মমভাৱে প্ৰহাৰেৰে নিজৰ পত্নীক মৃত্যুৰ মুখলৈ ঠেলি দিয়া বঙাইগাৱঁৰ বইটামাৰীৰ দেৱান গাৱঁৰ চম্বাৰু সূত্ৰধৰ (৩৯) নামৰ এজন লোকক আৰক্ষীয়ে আজি গ্ৰেপ্তাৰ কৰে। লগতে সূত্ৰধৰে গোপনে পুতি থোৱা তেওঁৰ পত্নীৰ মৃতদেহটো খান্দি উলিয়াই মৰণোত্তৰ পৰীক্ষাৰ বাবে প্ৰেৰণ কৰে।
জানিব পৰামতে, যোৱা ৩ অক্তোবৰত চম্বাৰু সূত্ৰধৰে তেওঁৰ পত্নী বিনীতা (৩৫)ক এজন প্ৰতিৱেশীৰ সৈতে আপত্তিজনক অৱস্থাত দেখা পায়। তাৰ পিছতে খঙত একো নাই হৈ তেওঁ পত্নীক নিৰ্মমভাৱে প্ৰহাৰ কৰে।
অতি বেয়াক আঘাতপ্ৰাপ্ত বিনীতাক পিছত চম্বাৰুৱে ১৫ কিলোমিটাৰ আঁতৰত থকা বঙাইগাওঁ অসামৰিক চিকিৎসালয়লৈ নিয়ে। কিন্তু তাৰ চিকিৎসকে বিনীতাৰ অৱস্থালৈ লক্ষ কৰি বৰপেটাৰ ফকৰুদ্দিন আলী আহমেদ চিকিৎসা মহাবিদ্যালয় আৰু চিকিৎসালয়লৈ নিবলৈ পৰামৰ্শ দিয়ে। পিছে দিন হাজিৰা কৰা চম্বাৰুৱে ৭২ কিলোমিটাৰ আঁতৰৰ বৰপেটাৰ চিকিৎসালয়লৈ নিয়াৰ পৰিৱৰ্তে বিনীতাক ঘৰলৈ লৈ আনে। চিকিৎসাৰ অভাৱত কালি অৰ্থাৎ ১২ অক্তোবৰত বিনীতাৰ ঘৰতে মৃত্যু হয়। কালি ৰাতিয়েই চম্বাৰুৱে গোপনে বিনীতাৰ মৃতদেহ সৎকাৰ কৰে।
ইফালে বিনীতাৰ মৃত্যুৰ খবৰ পাই প্ৰায় ৬ কিলোমিটাৰ আঁতৰত থকা বিনীতাৰ দেউতাকৰ পৰিয়ালে বিনীতাক চম্বাৰুৱে হত্যা কৰা বুলি বঙাইগাওঁ আৰক্ষী থানাত এখন এজাহাৰ দিয়ে।
এই এজাহাৰৰ ভিত্তিত গোচৰ ৰুজু কৰি বঙাইগাওঁ আৰক্ষীয়ে চম্বাৰুক গ্ৰেপ্তাৰ কৰিছে। চম্বাৰুৰ স্বীকাৰোক্তিৰ ভিত্তিত আৰক্ষীয়ে আজি বিনীতাৰ মৃতদেহটো খান্দি উলিয়ায় আৰু মৰণোত্তৰ পৰীক্ষাৰ বাবে প্ৰেৰণ কৰে। চম্বাৰু সূত্ৰধৰ এজনী ১০ বছৰীয়া কন্যা আৰু এটি ৬ বছৰীয়া পুত্ৰৰ বাপেক।
