গুৱাহাটী ডবল মাৰ্ডাৰ: অভিযুক্ত বন্দনাক লৈ অমৰজ্যোতিৰ মৃতদেহৰ সন্ধানত মেঘালয়লৈ ৰাওনা আৰক্ষী
মহানগৰীত সংঘটিত দুটাকৈ লোমহৰ্ষক, নৃশংস হত্যাকাণ্ডৰ ঘটনাই সমগ্ৰ ৰাজ্য জোকাৰি গৈছে। গুৱাহাটীৰ নুনমাটিৰ শিহৰণকাৰী ডাবল মাৰ্ডাৰৰ ঘটনাৰ তদন্ত অব্যাহত ৰাখিছে মহানগৰ আৰক্ষীয়ে। ইতিমধ্যে মেঘালয়ৰ পৰা শংকৰী দে’ৰ মৃতদেহ উদ্ধাৰ কৰিছে যদিও বন্দনা কলিতাৰ স্বামী অমৰজ্যোতি দে’ৰ মৃতদেহ এতিয়াও উদ্ধাৰ হোৱা নাই। মঙলবাৰে পুৱাই আৰক্ষীৰ এটা দল মূল অভিযুক্ত বন্দনা কলিতা আৰু আন দুজন অভিযুক্তক লগত লৈ অমৰজ্যোতিৰ মৃতদেহৰ সন্ধানত মেঘালয়লৈ ৰাওনা হৈছে।
সম্পত্তিৰ লালসাতে বন্দনা কলিতাই স্বামী আৰু শাহুৱেকক নিৰ্মমভাৱে হত্যা কৰাৰ অভিযোগ উত্থাপিত হৈছে। বন্দনাই প্ৰেমিক ধনটি ডেকা আৰু ধনটি ডেকাৰ বন্ধু অৰূপ দাসৰ সৈতে মিলি এই নৃশংস হত্যাকাণ্ড সংঘটিত কৰিছিল।
সোমবাৰে আৰক্ষীয়ে বন্দনা কলিতা, ধনটি ডেকা আৰু অৰূপ দাসক গ্ৰেপ্তাৰ কৰাৰ পিছত তিনিওজনকে লৈ মেঘালয়ত অভিযান চলাইছিল আৰু চেৰাপুঞ্জীৰ পৰা বন্দনাৰ শাহুৱেক শংকৰী দে’ৰ মৃতদেহ আৰক্ষীয়ে উদ্ধাৰ কৰিছিল।
আনহাতে, বন্দনাৰ স্বামী অমৰজ্যোতিৰ মৃতদেহ এতিয়াও উদ্ধাৰ হোৱা নাই। সেয়ে মঙলবাৰে পুৱাই অভিযুক্তক লৈ পুনৰ অভিযান চলাবলৈ মেঘালয়লৈ ৰাওনা হৈছে আৰক্ষী।
ইপিনে, সোমবাৰে আৰক্ষীয়ে ধনটি ডেকা আৰু অৰূপ দাসক আদালতত হাজিৰ কৰাই ৭ দিনৰ জিম্মাত লৈছে। উল্লেখ্য যে শাহুৱেক শংকৰী দে’ৰ মৃতদেহ উদ্ধাৰ হোৱাৰ পিছত বন্দনাই আৰক্ষীৰ আগত হত্যাকাণ্ডৰ ভয়ংকৰ বৰ্ণনা দিছিল।
শেহতীয়াভাৱে প্ৰকাশ পোৱা মতে, হত্যাকাণ্ডৰ ঘটনাত অভিযুক্ত অৰূপ দাসৰ কাইলৈ বিয়াৰ অভ্যৰ্থনা অনুষ্ঠান আছিল। যোৱা ২ ফেব্ৰুৱাৰীত অৰূপ বিবাহপাশত আবদ্ধ হৈছিল। কিন্তু বন্দনাৰ পৰিকল্পনাত হাত মিলোৱা অৰূপ এতিয়া আৰক্ষীৰ জালত। তাৰমাজতে অৰূপৰ পৰিয়ালে নিচাজাতীয় দ্ৰব্য খুৱাই অৰূপক ফচোৱাৰ অভিযোগ তুলিছে। ধনটিৰ সৈতে অৰূপৰ ঘৰলৈ যোৱা বন্দনাই হেনো নিজকে অনামিকা কলিতা বুলি চিনাকি দিছিল ।