দেশৰ মুখ্য ন্যায়াধীশ ৰঞ্জন গগৈৰ বিৰুদ্ধে যৌন নিৰ্যাতনৰ অভিযোগ অনা মহিলাগৰাকীয়ে এটা উৎকোচ লোৱা আৰু অপৰাধমূলক ষড়যন্ত্ৰৰ গোচৰত বিচাৰ চলি আছে। পূৰ্বতে মুখ্য ন্যায়াধীশৰ কাৰ্যালয়ত কৰ্মৰত মহিলাগৰাকী বৰ্তমান জামিনত আছে আৰু দিল্লী আৰক্ষীয়ে চলিত মাহৰ প্ৰথমভাগত তেওঁৰ জামিন বাতিলৰ আৰ্জি লৈ এখন জিলা আদালতৰ কাষ চাপিছিল।
আৰক্ষীৰ জামিন বাতিলৰ আবেদনৰ শুনানি শনিবাৰে দিল্লীৰ আদালতখনত হোৱাৰ কথা আছিল যদিও অভিযুক্ত অনুপস্থিত থকাৰ বাবে শুনানি বাতিল কৰা হয়। মহিলাগাৰীকয়ে অহা ২৪ এপ্ৰিললৈকে জামিনত থাকিব।
প্ৰাক্তন কনিষ্ঠ আদালত সহায়কগৰাকী উৎকোচৰ গোচৰত অভিযুক্ত হৈছিল আৰু তেওঁৰ বিৰুদ্ধে ভাৰতীয় দণ্ডবিধিৰ ৪২০, ৫০৬ আৰু ১২০ বি ধাৰাৰ অধীনত গোচৰ তৰা হৈছে।
নবীন কুমাৰ নামৰ এজন লোকে তেওঁৰ বিৰুদ্ধে অভিযোগ দাখিল কৰিছিল আৰু ২০১৯ৰ ৩ মাৰ্চত তেওঁৰ বিৰুদ্ধে এখন এজাহাৰ পঞ্জীয়ন কৰাৰ পাছত আৰক্ষীয়ে যোৱা মাহত মহিলাগৰাকীক গ্ৰেপ্তাৰ কৰে।
জিলা আদালতে যোৱা ১১ মাৰ্চত তেওঁক ন্যায়িক জিম্মালৈ প্ৰেৰণ কৰে যদিও ১২ মাৰ্চত তেওঁ জামিনত মুকলি হয়।
নবীন কুমাৰে দাখিল কৰা তেওঁৰ অভিযোগত কৈছে যে মহিলাগৰাকীয়ে উচ্চতম ন্যায়ালয়ত কাম কৰি থকা সময়ত তেওঁক উচ্চতম ন্যায়ালয়ত এগৰাকী প্ৰচেছ চাৰ্ভাৰ বা চতুৰ্থ বৰ্গৰ কৰ্মচাৰী হিচাপে নিযুক্তি দিয়াৰ নামত উৎকোচ ল’বলৈ সন্মত হৈছিল। অভিযোগ অনুসৰি কুমাৰে নিযুক্তিৰ বাবে মহিলাগৰাকীক অগ্ৰিম ৫০,০০০ টকা আদায় দিছিল যদিও তেওঁৰ পৰা চাকৰিটো সম্পৰ্কে বিসদ একো জানিব পৰা নাছিল।
অভিযোগ অনুসৰি, কুমাৰে মহিলগৰাকীক উচ্চতম ন্যায়ালয়ৰ চৌহদত লগ পাইছিল আৰু সৰ্বোচ্চ আদালতখনত তেওঁৰ চাকৰিটো সম্পৰ্কে জানিব বিচাৰিছিল।
কুমাৰে লগতে অভিযোগ কৰে যে মহিলাগৰাকীয়ে তেওঁক উচ্চতম ন্যায়ালয়ৰ চৌহদৰ ভিতৰত লগ নধৰিবলৈ কৈছিল আৰু তেনে কৰিলে তেওঁক ভুৱা গোচৰত ফচাই দিব বুলি কৈছিল।
এই গোচৰৰ তদন্তৰ ভাৰ দিল্লী আৰক্ষীৰ অপৰাধ শাখাক হস্তান্তৰ কৰা হৈছে।
কুমাৰে লগতে অভিযুক্ত মহিলাগৰাকী আৰু তেওঁৰ সহযোগীসকলে তেওঁক ভাবুকি দিয়া বুলি উল্লেখ কৰি অপৰাধ শাখাৰ উপ আৰক্ষী আয়ুক্তলৈ এখন আবেদন লিখি প্ৰেৰণ কৰিছিল।
