কা বিৰোধী আন্দোলনে ব্যাপক ৰূপ ধাৰণ কৰাৰ সময়তে বুধবাৰে মণিপুৰৰ ইম্ফলত শান্তিপূৰ্ণ সাংস্কৃতিক প্ৰতিবাদী সমদল এটাক আৰক্ষীয়ে বাধা প্ৰদান কৰাক লৈ তীব্ৰ প্ৰতিক্ৰিয়াৰ সৃষ্টি হৈছে।
কা বাতিলৰ দাবীত উলিওৱা সমদলটোত প্ৰতিবাদকাৰীসকলে ড্ৰাম, থলুৱা বাদ্যযন্ত্ৰ বজাই তথা বিভিন্ন শ্লোগান আৰু প্লে কাৰ্ড লৈ কাংলা প’ৰ্টৰ ফালে আগবাঢ়ি থকাৰ সময়তে আৰক্ষীয়ে বাধা প্ৰদান কৰিছিল।
হোদাম লেইৰাকৰ পৰা আৰম্ভ হোৱা শান্তিপূৰ্ণ সাংস্কৃতিক সমদলটোত স্বতঃস্ফুৰ্তভাৱে বিভিন্ন প্ৰান্তৰ তথা বহু লোকে অংশগ্ৰহণ কৰা পৰিলক্ষিত হয়।
‘সৰ্বনাশী এই আইনখন বাতিলৰ বাবে আমি নেদেখাজনৰ ওচৰত প্ৰাৰ্থনা জনাব বিচাৰিছিলো’, এইদৰে মন্তব্য কৰে প্ৰতিবাদকাৰীয়ে।
প্ৰতিবাদকাৰীসকলে আৰু কয়, ‘কেইচমপট লেইমাজাম লেইকাইত আমাক আৰক্ষীয়ে বাধা প্ৰদান কৰে আৰু আমাৰ প্লে কাৰ্ডসমূহ কাঢ়ি নিয়ে’।
‘সমগ্ৰ উত্তৰ-পূবতে নাগৰিকত্ব সংশোধনী আইনৰ বিৰুদ্ধে তীব্ৰ প্ৰতিবাদ হৈ আছে, আমি যে এই আইনখন বিচৰা নাই সেই কথাটো চৰকাৰে বুজি পাব লাগে’, এইদৰে ক্ষোভ প্ৰকাশ কৰে প্ৰতিবাদকাৰীয়ে।
আন এগৰাকী প্ৰতিবাদকাৰীৰ মতে, ‘কা আফস্পা(AFSPA)ৰ দৰে কঠোৰ আৰু গণবিৰোধী’।
প্ৰতিবাদকাৰীসকলে ‘কা বাতিল কৰক’, ‘খিলঞ্জীয়া লোকক ৰক্ষা কৰক’ আদি শ্লোগানেৰে সমদলত অংশ লোৱা পৰিলক্ষিত হয়।
