লখিমপুৰ জিলাৰ এগৰাকী বিশিষ্ট সামাজিক তথা সাংস্কৃতিক কৰ্মী, ক্ৰিকেটাৰ বুলু ৰাজখোৱা হিচাপে সকলোৰে মাজত চিনাকি কিৰণ শংকৰ ভাৰতীৰ সোমবাৰে সন্ধিয়া হৃদক্ৰিয়া বন্ধ হৈ মত্যু ঘটে।
মৃত্যুৰ সময়ত তেওঁৰ বয়স আছিল ৫৯ বছৰ। ৰাজখোৱাৰ অকাল বিয়োগত উত্তৰ লখিমপুৰত এক শোকৰ ছাঁ পৰিছে।
উত্তৰ লখিমপুৰৰ বিভিন্ন সামাজিক কাম-কাজৰ এগৰাকী চিনাকি মুখ তথা এগৰাকী আগশাৰীৰ এমেচাৰ থিয়েটাৰ অভিনেতা, সাংস্কৃতিক কৰ্মী আৰু গায়ক ৰাজখোৱা নগৰখনৰ কেইবাটাও অনুষ্ঠানৰ সৈতে জড়িত আছিল।
আনহাতে এগৰাকী ভাল ক্ৰিকেটাৰ হিচাপেও নাম থকা বুলু ৰাজখোৱাই ৭০ আৰু ৮০ৰ দশকত বিভিন্ন ক্ৰিকেট প্ৰতিযোগিতাত জিলাখনক প্ৰতিনিধিত্ব কৰিছিল।
ইয়াৰ উপৰি তেওঁ ১৯৮০ চনৰ আগভাগতে লখিমপুৰৰ পৰা গুৱাহাটীলৈকে চলা দুৰৱৰ্তী বাছ সেৱা আৰম্ভ কৰা এগৰাকী অন্যতম ব্যক্তি আছিল।
উত্তৰ লখিমপুৰৰ আহুচাউলগাঁও শ্মশানত আজি পুৱা তেওঁৰ নশ্বৰদেহৰ সৎকাৰ কৰা হয়। মৃত্যুৰ সময়ত তেওঁ পত্নী আৰু এগৰাকী কন্যা সন্তানক এৰি থৈ যায়।
