‘বাহুবলী’ খ্যাত ছুপাৰষ্টাৰ অভিনেতা প্ৰভাসে তেওঁৰ নতুন ছবিৰ ঘোষণা কৰিছে। পৰিচালক ওম ৰাৱাটৰ আহিবলগীয়া ছবি ‘আদিপুৰুষ’ত কাম কৰিব অভিনেতাগৰাকীয়ে।
ওম ৰাৱাটে ইয়াৰ পূৰ্বে অজয় দেবগন অবিনীত ছবি ‘তান্হাজী’ পৰিচালনা কৰিছিল।
অভিনেতা প্ৰভাসে আদিপুৰুষৰ পোষ্টাৰো শ্বেয়াৰ কৰিছে।
জানিব পৰা মতে, ছবিখনত প্ৰভাসে আদিপুৰুষৰ চৰিত্ৰ ৰূপায়ন কৰিব। অৱশ্যে, এতিয়ালৈকে ছবিখনত প্ৰভাসৰ চৰিত্ৰৰ লুকটো পোহৰলৈ অহা নাই।
ভূষণ কুমাৰে প্ৰযোজনা কৰিবলগীয়া এই ছবিখন ২০২২ত হিন্দী, তেলেগু, তামিল, মালয়ালম আৰু কানাড়া ভাষাত মুক্তি দিয়া হ’ব।
উল্লেখ্য যে ইয়াৰ উপৰি প্ৰভাসক আন এক ছবিত দীপিকা পাডুকনৰ লগতো দেখা যাব। দীপিকা আৰু প্ৰভাসে বীজয়ন্তী মুভিজৰ সৈতে কাম কৰিবলৈ আগবাঢ়িছে। অৱশ্যে ছবিখনৰ ঘোষণা এতিয়ালৈকে হোৱা নাই।
ছবিখনৰ পৰিচালক নাগ অশ্বিনে দীপিকাৰ সৈতে কাম কৰাৰ কথা ব্যক্ত কৰি কৈছে যে দীপিকাক এই ছবিখনৰ চৰিত্ৰটোত অভিনয় কৰাটো চাবলৈ মই উদগ্ৰীৱ হৈ পৰিছো। এইটো এনেকুৱা এটা হ’ব যিটো কোনো অভিনেত্ৰীয়ে পূৰ্বে কৰা নাই। তেওঁৰ চৰিত্ৰটোৱে সকলোকে আলোড়িত কৰি তুলিব।
তেওঁ লগতে কয় যে দীপিকা আৰু প্ৰভাসৰ যুটী চলচ্চিত্ৰ অনুৰাগীসকলৰ পছন্দৰ হ’ব আৰু এয়া ছবিখন তেওঁলোক দুজনৰেই কাহিনী। মোৰ বিশ্বাস যে এই ছবিখনে চাঞ্চল্যৰ সৃষ্টি কৰিব।
বাতৰি অনুসৰি, ছবিখনত কাম কৰাৰ বাবে দীপিকাই ২০ কোটি টকা পাৰিশ্ৰমিক ল’ব। আনহাতে, প্ৰভাসৰ পাৰিশ্ৰমিক হৈছে ৫০কোটি।
