আমেৰিকা যুক্তৰাষ্ট্ৰত ক’ভিড আক্ৰান্ত ৰোগীৰ মৃত্যু ৫ লাখৰো অধিক চুইছেগৈ। ৰোগীৰ মৃত্যুৰ তালিকাত আমেৰিকা যুক্তৰাষ্ট্ৰ বৰ্তমান শীৰ্ষত আছে।
আনহাতে দেশখনৰ ক’ভিড আক্ৰান্ত ৰোগীৰ সংখ্যা বৰ্তমানলৈকে মুঠ ২৮.১ মিলিয়ন।
সেই উপলক্ষে ৰাষ্ট্ৰপতি জ’ বিডেনে উপ-ৰাষ্ট্ৰপতি কমলা হেৰিছৰ স’তে হোৱাইট হাইচৰ সম্মুখত সোমবাৰে সন্ধ্যা মমবাতি প্ৰজ্বলন কৰি এক মিনিট মৌনতা অৱলম্বন কৰে।
অনুষ্ঠানটোত দেশবাসীক সম্বোধি বিডেনে কয় যে, এখন দেশ হিচাপে এনেধৰণৰ দুৰ্ভাগ্যজনক অৱস্থা সহ্য কৰিব নোৱাৰি।
‘‘আজি মই সকলো আমেৰিকানক সোঁৱৰাব বিচাৰিছো। আমি যিসকলক হেৰুৱাই আহিছো তেওঁলোকক সোঁৱৰণ কৰক।’’ আৱেগভৰা কণ্ঠেৰে বিডেনে আমেৰিকাবাসীক ক’ভিডৰ বিৰুদ্ধে যুঁজ দিবলে অনুপ্ৰেৰণা যোগায়।
উল্লেখযোগ্য যে ক’ভিড সম্পৰ্কে বিডেনৰ দৃষ্টিভংগী তেওঁৰ পূৰ্বৰ ৰাষ্ট্ৰপতি ড’ণাল্ড ট্ৰাম্পতকৈও পৃথক। ট্ৰাম্পে ক’ভিড ভাইৰাছৰ প্ৰতি সন্দেহজনক ভাৱ পোষণ কৰি ইয়াক ৰাজনীতিকৰণ কৰিছিল।
দেশখনৰ দুৰ্ভাগ্যজনক পৰিস্থিতিত ৰাষ্ট্ৰপতিজনে আগন্তুক পাঁচ দিনৰ বাবে ৰাষ্ট্ৰীয় পতাকাসমূহ অৰ্ধনমিত কৰি ৰাখিবৰ বাবে আদেশ দিয়ে।
ৰাষ্ট্ৰপতিজনে ক’ভিডত মৃত্যু হোৱা আমেৰিকানসকললৈ শ্ৰদ্ধাঞ্জলী জনাই কয় যে মৃত আমেৰিকানসকল অসাধাৰণ আছিল, তেওঁলোকে আমেৰিকাত জন্ম গ্ৰহণ কৰিছিল অথবা প্ৰব্ৰজন কৰিছিল আৰু জীৱনৰ অন্তিম উশাহ আমেৰিকাৰ বুকুতে গ্ৰহণ কৰিছিল।
বক্তব্য প্ৰদান কৰি ৰাষ্ট্ৰপতিজনে নিজৰ ব্যক্তিগত জীৱনৰো কিছু দূৰ্ভাগ্যজনক ঘটনাৰ কথা উল্লেখ কৰি ক’ভিডত মৃত্যু হোৱা লোকসকলৰ পৰিয়াল-পৰিজনৰ স’তে সমব্যথী হয়।
উল্লেখযোগ্য যে ১৯৭২ চনত বিদেনৰ পত্নী আৰু কন্যা এটা কাৰ দুৰ্ঘটনাত নিহত হৈছিল, আনহাতে এজন পুত্ৰ ২০১৫ চনত মগজুৰ কেন্সাৰত আক্ৰান্ত হৈ মৃত্যু হৈছিল।
ক’ভিড আক্ৰান্ত ৰোগীৰ সংখ্যাৰ তালিকাখনত আমেৰিকা যুক্তৰাষ্ট্ৰৰ পাছতে ভাৰত আৰু ব্ৰাজিলে স্থান লাভ কৰিছে।
