সমগ্ৰ বিশ্বই ক’ৰ’ণাৰ সন্ত্ৰাসত ত্ৰস্তমান।
সমগ্ৰ বিশ্বত এই মুহূৰ্তত ২৭.৩ মিলিয়ন লোক ক’ৰ’ণাত আক্ৰান্ত হোৱাৰ বিপৰীতে ৮.৯১ লাখ আক্ৰান্তৰ ইতিমধ্যে মৃত্যু ঘটিছে।
তেনে সময়তে ক’ৰ’ণাৰ ভাইৰাছৰ উৎপত্তি দেশ চীনে ক’ৰ’ণাৰ বিজয় উৎসৱ পালন কৰিছে।
মংগলবাৰে গ্ৰেট হল অৱ পিপিএলৰ এখন জনসভাত চীনৰ ৰাষ্ট্ৰপতি চি জিংপিঙে ভাষণ প্ৰদান কৰি ক’ৰ’ণাৰ বিজয় উৎসৱ পালনৰ কথা ঘোষণা কৰে।
তেওঁ জনসভাখনত কয় যে, তেওঁৰ দেশে ক’ৰ’ণা ভাইৰাছৰ বিৰুদ্ধে অত্যন্ত কঠিন আৰু ঐতিহাসিক যুদ্ধ কৰি সফল হৈছে।
আনকি দেশখনে ক’ৰ’ণা ভাইৰাছৰ বিৰোধী যুদ্ধত বিজয়ী হোৱাৰ উপলক্ষে মংগলবাৰে বিশেষজ্ঞ চিকিৎসকক সন্মান জনোৱাৰ লগতে পুৰস্কৃতো কৰে।
ইয়াৰ মাজত চীনৰ বয়োজ্যেষ্ঠ জনপ্ৰিয় চিকিৎসক ৮২ বৰ্ষীয় ঝং নানচঙো আছে।
ক’ৰ’ণা ভাইৰাছত আক্ৰান্ত হৈ মৃত্যু হোৱা লোকসকলৰ স্মৃতিত উক্ত অনুষ্ঠানতে মৌনতা পালন কৰি শ্ৰদ্ধাও জনোৱা হয়।
ৰাষ্ট্ৰপতি জিংপিঙে অনুষ্ঠানত চীনা নাগৰিকৰ জীৱন ৰক্ষা কৰিবলৈ তেওঁ সকলোবোৰ কৰিবলৈ ৰাজী বুলিও মন্তব্য কৰে।
চীনৰ এই ক’ৰ’ণাৰ বিজয় উৎসৱ অনুষ্ঠানত উপস্থিত থকা জনতাই মুখত মাস্ক পিন্ধি সামাজিক দূৰত্ব বৰ্তাই ৰখাৰ পৰলিক্ষিত হয়।
