প্ৰেছ কাউন্সিল অৱ ইণ্ডিয়া (PCI)ৰ সদস্য বি আৰ গুপ্তাই সংবাদ মাধ্যমৰ হকে ব্যক্তিগত বা সামূহিকভাৱে কাম কৰিবলৈ অপাৰগতা প্ৰকাশ কৰি নিজৰ পদবীৰ পৰা পদত্যাগ কৰিছে।
পদত্যাগপত্ৰত গুপ্তাই বৰ্তমান সময়ত সংবাদ মাধ্যম এক ‘গভীৰ সংকটত’ আছে বুলি উল্লেখ কৰি কয় যে PCI-ৰ দায়িত্ব আছিল সংবাদ মাধ্যম আৰু ইয়াৰ কৰ্মীসকলক অবিচ্ছিন্নভাৱে উৎসাহ যোগাই অহা।
‘কিন্তু এতিয়া সকলোৱে উপলব্ধি কৰিছে যে সংবাদ মাধ্যম এক গভীৰ সংকটত আছে,’ গুপ্তাই কয়।
যি উদ্দেশ্য লৈ PCI গঠন হৈছিল তাত ই উপনীত হ’ব পৰা নাই বুলি উল্লেখ কৰি তেওঁ লগতে কয় যে তেওঁ নিজেও সংবাদ মাধ্যমৰ স্বতন্ত্ৰতাৰ হকে বিশেষ একো কৰি থকা নাই।
তেওঁ আৰু কয় যে সংবাদ মাধ্যম আৰু সংবাদকৰ্মীসকলে সন্মুখীন হৈ থকা সংকটৰ পৰা ওলাই অহাটো এটা ডাঙৰ প্ৰত্যাহ্বান।
গণতন্ত্ৰক অধিক শক্তিশালী কৰাৰ বাবে জনসাধাৰণ আৰু সংবাদ মাধ্যমক সহায় কৰিবলৈ নিৰপেক্ষ ভূমিকা আৰু দায়িত্ব গ্ৰহণ কৰাটো তেওঁৰ বাবে কঠিন হৈ পৰিছিল, তেওঁ কয়।
সংবাদ মাধ্যমৰ লোকসকলে চাকৰী হেৰুৱা আৰু দৰমহা কৰ্টন হোৱা বিষয়টো উল্লেখ কৰি তেওঁ কয়, ‘সংবাদকৰ্মীসকলে সামাজিক, ৰাজনৈতিক আৰু অৰ্থনৈতিক ন্যায়ৰ বাবে যুঁজি আছে’।
অৱশ্যে PCI-ৰ অধ্যক্ষ ন্যায়াধীশ চি কে প্ৰসাদে এই পৰ্যন্ত গুপ্তাৰ পদত্যাগপত্ৰ গ্ৰহণ কৰা নাই।
