কোকৰাঝাৰ জিলাৰ অন্তৰ্গত শক্তিআশ্ৰম অঞ্চলৰ এগৰাকী বিশিষ্ট সমাজকৰ্মী তথা শক্তিআশ্ৰম স্বামী যোগানন্দ গিৰি মহাবিদ্যালয়ৰ এগৰাকী অধ্যক্ষ ড° পৰেশ চন্দ্ৰ ৰায়। শক্তিআশ্ৰম অঞ্চলৰ এখন অতি চিনাকী মুখ এইগৰাকী ড° পৰেশ চন্দ্ৰ ৰায়।
সৰুৰে পৰা আৰ্থিক দৈন্যতাৰ মাজেৰে ডাঙৰ-দীঘল হোৱা ব্যক্তিগৰাকীৰ পিন্ধনত শক্তিআশ্ৰম অঞ্চলবাসী ৰাইজে আজিলৈকে কেৱল প্ৰত্যক্ষ কৰিছে বগা আৰু মাটিয়া ৰঙৰ চাৰ্ট-পেন্টহে৷
আজিৰ পৰা ১৯ বছৰ পূৰ্বে এইগৰাকী অধ্যক্ষই কাম কৰিছিল কোকৰাঝাৰ জিলাৰ অন্তৰ্গত শক্তিআশ্ৰম উচ্চতৰ মাধ্যমিক আৰু কাৰিকৰী বিদ্যালয়ৰ এগৰাকী বিষয় শিক্ষক হিচাপে।
কিন্তু গাঁৱৰ দৰিদ্ৰ ল’ৰা-ছোৱালীসকলৰ বাবে শক্তিআশ্ৰম অঞ্চলত এখন উচ্চ শিক্ষানুষ্ঠান গঢ় দিয়াৰ স্বাৰ্থত ড° পৰেশ চন্দ্ৰ ৰায় নামৰ শিক্ষকগৰাকীয়ে বিগত ২৭ টা বছৰে জৰিত হৈ আহিছিল শক্তিআশ্ৰম স্বামী যোগানন্দ গিৰি মহাবিদ্যালয়ৰ লগত।
ভেন্সাৰ হিচাপে খোলা স্বামী যোগানন্দ গিৰি মহাবিদ্যালয়ৰ কামৰ স্বাৰ্থতেই পিছত এইগৰাকী শিক্ষকে শক্তিআশ্ৰম উচ্চতৰ মাধ্যমিক আৰু কাৰিকৰী বিদ্যালয়ৰ অসমীয়া বিভাগৰ বিষয় শিক্ষকৰ চাকৰিটো এৰি দিবলগীয়াত পৰে আৰু স্বামী যোগানন্দ গিৰি মহাবিদ্যালয়ৰ অধ্যক্ষ হিচাপে দায়িত্বভাৰ গ্ৰহণ কৰিবলৈ বাধ্য হয়।
উল্লেখ্য যে, আজিৰ পৰা ৮ বছৰ পূৰ্বে ভেন্সাৰৰ পৰা চৰকাৰীকৰণ হৈছিল কোকৰাঝাৰৰ এই শক্তিআশ্ৰম স্বামী যোগানন্দ গিৰি মহাবিদ্যালয়খন৷
তেওঁৰ কাৰ্যকালতে কোকৰাঝাৰৰ লগতে বিভিন্ন প্ৰান্তৰ বহু ল’ৰা-ছোৱালীও সুখ্যাতিৰ উত্তীৰ্ণ হৈছে এইখন মহাবিদ্যালয়ৰ পৰা। কিন্তু দুখৰ বিষয় ৰাজ্যচৰকাৰে লোৱা সিদ্ধান্তমৰ্মে নতুন শিক্ষানীতি অনুসৰি অধ্যক্ষৰ বাবে লগা সকলো উচিত ডিগ্ৰী থকাৰ পিছতো আজি চৰকাৰী দৰমহা পোৱাৰ পৰা বঞ্চিত হৈ একমাত্ৰ ত্যাগ স্বীকাৰেৰে শক্তিআশ্ৰম স্বামী যোগানন্দ গিৰি মহাবিদ্যালয়ৰ অধ্যক্ষ পদৰ পৰা সোমবাৰে এনেদৰে অৱসৰ ল’লে এইগৰাকী নিষ্ঠাবান অধ্যক্ষই৷
অধ্যক্ষগৰাকীৰ অৱসৰৰ মুহূৰ্তত ছাত্ৰ-ছাত্ৰীসকলৰ লগতে তেওঁৰ সহকৰ্মী, গুণমুগ্ধসকল অত্যন্ত ব্যথিত হৈ পৰে আৰু এক অতি আৱেগিক পৰিৱেশত তেওঁক বিদায় দিয়ে।
