বিশ্ব সুন্দৰী প্ৰিয়ংকা চোপ্ৰাই মহিলা বক্সিঙৰ বিশ্ব চেম্পিয়ন মেৰীকমৰ ওপৰত ২০১৪চনত মুক্তি লাভ কৰা ছবি ‘মেৰীকম’ৰ মুল চৰিত্ৰটোত অভিনয় কৰিছিল।ছবিখনে বক্স অ’ফিচত সফলতা লাভ কৰাৰ লগতে সমালোচকৰো প্ৰশংসা বুটলিছিল। তদুপৰি, ছবিখনে ৰাষ্ট্ৰীয় পুৰস্কাৰেৰেও সন্মানিত হৈছিল।
ছবিখনত অলিম্পিক বিজয়ী বক্সাৰৰ ভূমিকাত অৱতীৰ্ণ হৈছিল প্ৰিয়ংকা চোপ্ৰা। কিন্তু সম্প্ৰতি প্ৰিয়ংকাই কৈছে যে ছবিখনত মেৰীকমৰ চৰিত্ৰটো তেওঁৰ পৰিৱৰ্তে আন কাৰোবাকহে দিয়া উচিত আছিল।
মেৰীকম ছবিখন মুক্তিৰ পাছত উত্তৰ-পূবত ছবিখনক লৈ নানা বিতৰ্ক হৈছিল। মণিপুৰৰ লোকে মেৰীকমৰ ভূমিকাত প্ৰিয়ংকাই অভিনয় কৰাত আপত্তি কৰিছিল। তদুপৰি, পিএলএ উগ্ৰপন্থীৰ ভাবুকিত ইম্ফলৰ কিছু চিনেমা হলত ছবিখন প্ৰদৰ্শন নহ’ল। মণিপুৰৰ বিশ্ব চেম্পিয়ন গৰাকীৰ সৈতে বিশ্ব সুন্দৰী প্ৰিয়ংকাৰ মুখৰ গঢ় নিমিলা বুলিও কথা উঠিছিল।
লগতে পঢ়ক: ব্ৰিটেইনৰ পৰৱৰ্তী প্ৰধানমন্ত্ৰী পদৰ দৌৰত কোন এই ভাৰতীয় বংশোদ্ভৱ ঋষি ছুনাক?
উক্ত বিষয়বোৰক লৈ তেতিয়া মুখ নুখুলিলেও এতিয়া মুখ খুলিছে প্ৰিয়ংকাই। তেওঁ কৈছে,’ মেৰীকমৰ চৰিত্ৰত উত্তৰ-পূব ভাৰতৰ কোনো অভিনেত্ৰীক কাষ্ট কৰা উচিত আছিল।‘
প্ৰিয়ংকাই লগতে কয়,’চাওক, মই জানো মেৰীকমৰ সৈতে মোৰ মুখৰ বা শৰীৰৰ তেনে কোনো সাদৃশ্য নাই। তথাপি মেৰীকমৰ দৰে জীৱন্ত কিংবদন্তিৰ চৰিত্ৰত অভিনয়ৰ সুযোগ এৰি দিব বিচৰা নাছিলো। অভিনেত্ৰী হিচাপে সেই আকাংখা আছিল। ইয়াৰ লগতে এগৰাকী মহিলা হিচাপে তেওঁ মোক সকলো সময়তে অনুপ্ৰাণিত কৰি গৈছে।‘
লগতে পঢ়ক:মহানগৰীত উৰুকাৰ উছাহ! গুৱাহাটীত উৰুকাৰ নিশা বিক্ৰী হ’ল ২.৭৫কোটি টকাৰ বিলাতী সুৰা
উল্লেখ্য যে মেৰীকমৰ চৰিত্ৰত অভিনয় কৰাৰ বাবে প্ৰিয়ংকাই মণিপুৰৰ মেৰীকমৰ গাঁৱৰ ঘৰতো যথেষ্ট সময় কটাইছিল আৰু তেওঁৰ পৰিয়ালৰ লোকসকলৰ সৈতে ভাৱ বিনিময় কৰি মেৰীকমৰ সকলো কথা জনাৰ চেষ্টা কৰিছিল।
