নগাঁৱৰ খাগৰিজান মহাবিদ্যালয়ৰ অৱসৰপ্রাপ্ত অধ্যক্ষ, বিশিষ্ট শিক্ষাবিদ ড০ সাগৰ বৰুৱাৰ দেওবাৰে পুৱা হোজাই জিলাৰ লংকাস্থিত নিজা বাসভৱনত পৰলোকপ্ৰাপ্তি ঘটে।
গোলাঘাট জিলাৰ বোকাখাতৰ ‘লখৌজানত জন্মগ্ৰহণ কৰা বৰুৱাই লংকা মহাবিদ্যালয়ত অধ্যাপনা আৰম্ভ কৰি পৰৱৰ্তী সময়ত নগাঁৱৰ খাগৰিজান মহাবিদ্যালয়ত অধ্যক্ষ হিচাপে যোগদান কৰিছিল।
তেওঁ ২০০৭ চনৰ পৰা খাগৰিজান মহাবিদ্যালয়ত অধ্যক্ষ হিচাপে একনিষ্ঠ সেৱা আগবঢ়াই ২০১৮ চনত অৱসৰ গ্ৰহণ কৰে। কবি হিচাপেও খ্যাতি লাভ কৰা ড০ সাগৰ বৰুৱাই অসমীয়া সাহিত্য সন্মিলনীৰ ৰাজ্যিক সভাপতিৰ দায়িত্ব পালন কৰিছিল।
কেইবাখনো উচ্চমানৰ গ্ৰন্থৰ লেখক ড০ বৰুৱাই নিজা খৰচত বহু মানবিশিষ্ট আলোচনা-চক্ৰৰ আয়োজন কৰিছিল। ড০ বৰুৱাই নগাঁৱৰ শ্ৰীমন্ত শংকৰদেৱ বিশ্ববিদ্যালয়ত গবেষণা তত্বাৱধায়ক হিচাপেও কিছুদিন কাম কৰিছিল। তেওঁ ভাৰতীয় গণনাট্য সংঘৰ সৈতেও জড়িত আছিল।
শিক্ষাবিদগৰাকীৰ মৃত্যুত নগাঁৱকে ধৰি অসমৰ বৌদ্ধিক মহলত শোকৰ ছাঁ পৰিছে। তেওঁৰ মৃত্যুৰ খবৰ পোৱাৰ পিছতে লংকাৰ বাসগৃহত অগণন গুণমুগ্ধই উপস্থিত হৈ তেওঁক শেষ শ্ৰদ্ধা নিবেদন কৰে।
ড০ সাগৰ বৰুৱাৰ মৃত্যুত খাগৰিজান মহাবিদ্যালয়ৰ শিক্ষক পৰিষদ, অসমীয়া সাহিত্য সন্মিলনী, শ্ৰীমন্ত শংকৰদেৱ বিশ্ববিদ্যালয়, নগাঁও মহাবিদ্যালয়, এ ডি পি কলেজ, অসম জাতীয়তাবাদী যুব-ছাত্ৰ পৰিষদ,ভাৰতীয় গণনাট্য সংঘ, ৰূপহী কলেজ, চিপিআই আদিয়ে শোক প্রকাশ কৰিছে।
মৃত্যুৰ সময়ত তেওঁ পত্নী আৰু দুই পুত্ৰসহ বহু আত্মীয়-স্বজনক এৰি থৈ গৈছে।
