প্ৰটিন হৈছে মানুহৰ শৰীৰৰ অন্যতম উপাদান। শৰীৰ সুস্থ কৰি ৰখা, ক্ষতিগ্ৰস্ত কোষ মেৰামতি আৰু পেশী সবল কৰি ৰখাৰ বাবে প্ৰটিন অতি প্ৰয়োজনীয়। বহুতে ওজন কমাবলৈ ‘প্ৰটিনযুক্ত খাদ্য গ্ৰহণ কৰে। প্ৰটিনৰ প্ৰতি এই আকৰ্ষণ দেখি বিভিন্ন কোম্পানীয়ে এতিয়া কফি, চকলেট, দৈ, চীজ কেক আনকি আইচক্ৰীমত প্ৰটিন যোগ কৰিছে। খাদ্যত উচ্চ মাত্ৰাৰ প্ৰটিন যোগ কৰাৰ দাবী কৰা হয়। কেলৰি, চেনি নামমাত্ৰ। ফলত নিশ্চিন্তে ইয়াক সেৱন কৰিব পাৰি
দালি, মাছ, মাংস, কণী, পনিৰ, সৰিয়হ আদিত প্ৰটিন পোৱা যায়। কিন্তু প্ৰচেছড খাদ্যত যোগ কৰা প্ৰটিনৰ প্ৰয়োজন আছেনে? পুষ্টিবিদ শম্পা চক্ৰৱৰ্তীৰ মতে, এজন প্ৰাপ্তবয়স্কৰ প্ৰতি কিলোগ্ৰাম ওজনত ০.৮ গ্ৰাম প্ৰটিন লাগে। ব্যায়াম কৰিলে ১.৩ৰ পৰা ১.৬ গ্ৰাম পৰ্যন্ত ল’ব পাৰে। দৌৰবিদৰ বাবে বেছি প্ৰটিনৰ প্ৰয়োজন। বয়স, ওজন আৰু কামৰ ধৰণৰ ওপৰত প্ৰটিনৰ পৰিমাণ নিৰ্ভৰ কৰে।
বেছি প্ৰটিন খোৱাটো সদায় ভাল নহয়। ইয়াৰ বিপৰীত প্ৰভাৱ পৰিব পাৰে। পুষ্টিবিদসকলে কয়, শৰীৰ সুস্থ ৰাখিবলৈ কেৱল প্ৰটিন নহয়, কাৰ্বহাইড্ৰেট, ভাল চৰ্বি, ভিটামিন, খনিজ আৰু আঁহৰো প্ৰয়োজন। সকলো খাদ্য পৰিমিতভাৱে খোৱাটো জৰুৰী।
প্ৰচেছড খাদ্যত প্ৰটিন কফি, আইচক্ৰীম আৰু দৈত প্ৰটিন যোগ কৰিলে স্বাস্থ্যকৰ হয় নেকি? ইয়াৰ উত্তৰত বিশেষজ্ঞসকলে প্ৰচেছড খাদ্য কম খাবলৈহে পৰামৰ্শ দিছে। উদাহৰণস্বৰূপে, প্ৰটিন-গাখীৰত দুগুণ প্ৰটিন থাকে, কিন্তু ইয়াক প্ৰক্ৰিয়াৰ মাধ্যমে তৈয়াৰ কৰা হয়। গাখীৰৰ পানী আঁতৰাই গুড়ি মিহলাই তৈয়াৰ কৰা হয়। এনে প্ৰটিনে আন পুষ্টিৰ ভাৰসাম্য নষ্ট কৰিব পাৰে। পুষ্টিবিদসকলে কয়, প্ৰটিনৰ গুণাগুণ কোম্পানীৰ তৈয়াৰ প্ৰক্ৰিয়াৰ ওপৰত নিৰ্ভৰ কৰে।
প্ৰটিনৰ প্ৰয়োজন পূৰণৰ বাবে ডাক্তৰ আৰু পুষ্টিবিদসকলে সতেজ খাদ্যৰ ওপৰত গুৰুত্ব দিয়ে। কেক বা দৈৰ পৰিৱৰ্তে বাদাম, চজিনা, কাবুলী চজিনা, আদি খোৱাৰ পৰামৰ্শ দিছে। প্ৰটিনৰ লগতে শৰীৰৰ আন পুষ্টিৰ ভাৰসাম্য ৰক্ষা কৰাটোৱেই সুস্বাস্থ্যৰ ৰহস্য বুলি মত প্ৰকাশ কৰিছে।
