মেঘালয়ৰ তুৰাত ৰাজ্যখনৰ শীতকালীন ৰাজধানী স্থাপনৰ দাবীত চলি থকা প্ৰতিবাদে আজি হিংসাত্মক ৰূপ ধাৰণ কৰে। প্ৰতিবাদী একাংশ লোকে আজি সন্ধিয়া মেঘালয়ৰ মুখ্যমন্ত্রী কনৰাড চাংমাৰ কার্যালয়ত আক্ৰমণ চলায়।
এই আক্রমণত আহত হয় ৫ গৰাকী নিৰাপত্তাৰক্ষী৷ অৱশ্যে মুখ্যমন্ত্ৰী চাংমা কোনোধৰণৰ আঘাতৰ সন্মুখীন হোৱা নাই যদিও শতাধিক লোকে কাৰ্যালয়ৰ চৌহদ ঘেৰি ধৰাৰ ফলত তেওঁ কাৰ্যালয়ৰ ভিতৰতে আৱদ্ধ হৈ থাকিবলগীয়া হয়।
উল্লেখ্য যে, তুৰাত শীতকালীন ৰাজধানী স্থাপনৰ দাবীত গাৰো হিলছৰ একাংশ সংগঠন তথা জনসাধাৰণে অনশন কাৰ্যসূচী ৰূপায়ণ কৰিছে।আজি সন্ধিয়া মুখ্যমন্ত্ৰীৰ কাৰ্যালয়ৰ বাহিৰত শতাধিক লোক সমবেত হয়।
মুখ্যমন্ত্ৰী চাংমাই প্ৰতিবাদকাৰীৰ সৈতে কথা পাতি থকাৰ সময়তে ভিৰৰ মাজৰ একাংশ লোকে শিলগুটি নিক্ষেপ কৰিবলৈ আৰম্ভ কৰে। এই আক্ৰমণত ৫ গৰাকী নিৰাপত্তাৰক্ষী আহত হয়। আক্ৰমণৰ পিছতে চাংমাক লগে লগে কাৰ্যালয়ৰ ভিতৰলৈ লৈ যোৱা হয়।
পৰিস্থিতি ক্ৰমাৎ উত্তপ্ত হৈ পৰাৰ ফলশ্ৰুতিত নিৰাপত্তাৰক্ষীয়ে কন্দুৱা গেছ নিক্ষেপ কৰে। লক্ষণীয়ভাৱে সমবেত প্ৰতিবাদকাৰীৰ মাজৰ পৰা শিল নিক্ষেপ কৰা হয় যদিও এই আক্ৰমণত জড়িত থকাসকল প্ৰতিবাদী সমদলটোৰ অংশ নহয় বুলি দাবী কৰিছে আন্দোলনৰ নেতৃত্বই।
ইফালে প্ৰতিবাদকাৰীয়ে প্ৰৱেশ পথ অৱৰোধ কৰি ৰখাৰ বাবে মুখ্যমন্ত্ৰী চাংমা কাৰ্যালয়ৰ পৰা ওলাই আহিব পৰা নাই বুলি মুখ্যমন্ত্ৰীৰ কাৰ্যালয়ে প্ৰকাশ কৰে। ইফালে পৰিস্থিতি নিয়ন্ত্ৰণত আছে যদিও উত্তেজনা হ্ৰাস পোৱা বুলিও মুখ্যমন্ত্ৰীৰ কাৰ্যালয়ে সদৰী কৰে।
