দৰং আৰক্ষীয়ে আলফা (স্বাধীন)ৰ এজন প্ৰচাৰ কৰ্মীক বৃহস্পতিবাৰে গ্ৰেপ্তাৰ কৰিছে।
গ্ৰেপ্তাৰ হোৱা লোকজন হৈছে মঙলদৈ আৰক্ষী থানাৰ অধীনৰ দাহি তামুলিপাৰা গাঁৱৰ বিশ্বজিত ডেকা (৩৩)।
চাইবাৰদ’ম গুৱাহাটীৰ পৰা পোৱা তথ্যৰ ভিত্তিত দৰং আৰক্ষীয়ে নিজ ঘৰৰ পৰা লোকজনক গ্ৰেপ্তাৰ কৰিছে।
“তেওঁক জেৰাৰ সময়ত আৰু তেওঁৰ ম’বাইল ফোনটো পৰীক্ষা কৰাৰ পিছত আমি জানিব পাৰিছো যে তেওঁ ফেচবুকৰ জৰিয়তে আলফা (স্বাঃ)ৰ প্ৰতীক, বিপ্লৱী গীত আৰু অস্ত্ৰ আদিৰ প্ৰচাৰ কৰিছিল,” দৰঙৰ আৰক্ষী অধীক্ষক অমৃত ভূঞাই নৰ্থইষ্ট নাওক জনায়।
আৰক্ষী অধীক্ষকজনে লগতে জনায় যে বিশ্বজিত অসম নামেৰে তেওঁ ফেচবুক প্ৰফাইল চলাইছিল আৰু অসম উপাধি ব্যৱহাৰ কৰা ৮/৯টা প্ৰফাইলৰ সৈতে ফেচবুক মেছেঞ্জাৰত তেওঁৰ যোগাযোগ আছিল।
তেওঁৰ বিৰুদ্ধে মঙলদৈ থানাত ভাৰতীয় দণ্ড বিধিৰ 120(b)/121/121A, বেআইনী কাৰ্য্যকলাপ প্ৰতিৰোধ আইনৰ 10/13 আৰু তথ্য প্ৰযুক্তি আইনৰ 66(F)(1)(A) ধাৰাত এক গোচৰ (440/2020) পঞ্জীয়ন কৰা হৈছে।
আৰক্ষী অধীক্ষক ভূঞাই জনাই যে এই সন্দৰ্ভত অধিক জেৰা চলাই থকা হৈছে।
